Italy a Scudetto inchuhnaah Inter Milan chuan an hmelma AC Milan laka huntha an neih an bawhpelh a. Bologna lakah chesualin 2-1 in an tlawm a, hmahruaitu nih theihna hun an hloh.
Nilaini zana Stadio Renato Dall’Ara a inkhel hi January thla a khelh tur kha niin Bologna squad-ah Covid 19 a darh avangin sawn hlat a ni a. Italy champion lai Inter in khelh khata an khelh tlem zawkna chu Milan laka an huntha tih hria in inkhel bul an tan.
Duhthusam a bul tanin Croatian forward Ivan Perisic chuan minute thumnaah goal a khung nghal a. Mualneitu in first half-ah chhanglet ve lehnghal in an forward rinrawl Marko Arnautovic chuan tun season-a a goal 13-na minute 28-naah a khung.
Inter in second half-ah chakna goal khung turin chance an nei hnem zawk a, nimahsela huntawp hma in captain Samir Handanovic aia khel goalkeeper Ionut Radu a chesual a. A lama ball kal a petchhuak tur chu pet thelhin Nicola sansone chuan remchang a la a, Bologna chakna goal a khung
Inter hi inelna hrang hranga an match hnuhnung 12 chhunga an tlawm hmasak ber a ni a. Coach Simone Inzaghi chuan, “Radu hi January khan a khel a, theihtawpin a inbuatsaih ziah thin. Player dang chetsual aia a lansarh vang mai a ni a, goalkeeper tha a ni.” tiin a thlavang a hauh.