Aizawl: Lunglei MZP Headquarters chuan Lungleiah MCS officer dahbelh phutin nimin khan DC office tualah an pungkhawm.
He hunah hian Lunglei MZP Headquarters President Lalpeksanga Chenkual chuan Lunglei district-ah MCS officer post 21 a awm laiin mi pakua chauh dah an nih avangin officer-te an indaih loh hle tih sawiin, hetiang a nih avang hian office-a thawktute mai bakah mipuiten harsatna tam tak an tawk tih a sawi.
Officer pakua chauh an awm lai pawha indaih lohna a nasat tawh laiin tun hnaiah officer pahnih chu an kaisan avangin hmun dangah sawn leh a nih thu leh officer pasarih chauh an awm thu a sawi a, “Kawng hrang hrangah officer an indaih loh vang hian Lunglei district mipuite chuan harsatna an tawk mek,” a ti.
Lalpeksanga Chenkual chuan officer indaih lohna sukiang tura vawi tam sorkar an ngenna tihhlawhtlin a la ni lo ta zel chu hriatthiam harsa an tih thu leh Lunglei mipuite hmusitnaah an ngai tih a sawi.
Lunglei Municipal Council inthlan hmachhawn mai tur an nih laia election officer hna mi dangin an kawp ringawtte chu ngaihthiam harsa an tih thu sawiin, “District thar awm vanga Lunglei mipuiten kan tuar ringawt hi hriatthiam a har a ni,” a ti.
Lunglei MZP chuan Lungleiah MCS officer dah belh vat turin sorkar an ngen nawn a, Ningani zanah sorkar atanga chhanna an hmu lo a nih chu na zawkin hmalak an tum.