LPS Promotions leh K & P Entertainment chuan professional boxing, ‘Clash of the Stars’ a buatsaih dawn a, Mizo leh Manipuri boxer tha te an innuai dawn bakah ‘celebrity fight’ ah Mizo milar pahnih an inhnek dawn.
Mizo boxer-te hmaah Manipur boxer rual
May 14, Inrinni zanah Dawrpui Multipurpose Centre-ah HC Lalramfela leh C Lalhruaitluanga’n a vawi thum nan professional boxing an khel dawn a, Zochhuanawma Fanai leh Zoengmawia Hlondo chuan professional luhchilh nan an hmang ve thung ang.
A inlan hnuhnun berah LPS Pro Fight bantamweight champion ni tawh Ramfela’n lightweight huangah rei lo te chhungin Parash Chauhan a knockout a, tlawm nei lova vawi thum chak zawn turin AK Naoton-a lakah round khat bak a mamawh a ring lo.
Nikum November 27 khan Dawrpuiah LPS Fight Night II huaihawt a ni a, Ramfela bakah Hruaia’n super welterweight huangah mit tlung takin a khel a, Laishram Ronalson Khuman-a hmaah vawi thum chak zawn tumin a inhnek dawn a ni.
March 2021 khan Zochhuana’n professional luhchilh theihna hun tha a bawhpelh hnuah bul a tan dawn a, Thokchom Sagar nen an innuai ang.
Super Boxing League-a tel tawh Zoengmawia Hlondo chuan Laikhuram Shanti Kumar a bitum ve thung dawn a, Ramfela leh Hruaia tih loh boxer dang zawngin a vawi khat nan professional boxing an khel dawn.
Manipuri boxer paliin Aizawl leilungah professional huang dai lutin chona an hmachhawn dawn a, LPS Pro Fight leh inelna danga hnuhma nei tawh Mizo boxer thaten dimdawina tel lova lo mikhual an tum.
‘Celebrity fight’
Tunlaia khawvel huap entertainment industry-ah thil ngaihven hlawh leh hralh kal tak a awm a, chu chu ‘celebrity fight’ niin boxing ring chhungah milar an incho thin.
May 14 zana boxing show-ah hian rapper G’nie leh actor Papuia Pachuau chuan an inchona hruihrual chhungah chin fel an tum a, boruak siamtu ber ni mekin Ramhlun North tlangval pahnih hian nikum kum tawp atang khan inhnek turin mumal takin inbuatsaihna an kalpui tawh.
An rih zawng leh san zawng inang lo mah se inhnek turin harsatna an nei lo va, boxing hmuhnawm tak lantir theih an inbeisei bawk.
Indian Boxing Council chuan he inhnek huaihawt tur hian phalna a pe fel tawh a, LPS pay-per-view leitute hnenah live telecast-a pek chhuah a ni ang.