Sorkar laipuia New & Renewable Energy leh Chemicals & Fertilizers changtu Minister of State Bhagwant Khuba chuan nimin khan zan hnih riak turin Mizoram a lo thleng a. Mizoram Chief Secretary Dr Renu Sharma chuan lo lawmin power & electricity, agriculture leh tourism department official-te nen an thukhawm nghal.
Nimin chawhnua Aijal Club-a thutkhawmah hian Dr Sharma chuan Khuba a lo lawmnaah Mizoram state dinhmun tlangpui te, mipuite eizawnna leh khawtlang nun te, Mizo culture leh nunphung te, India sorkarin a ngaih pawimawh em em Sustainable Development Goals (SDG)-a Mizoram hmalakna te a hrilh a ni.
|hutkhawmah hian Mizoram State Power Secretary Lalengmawia chuan kawlphethaa Mizoram dinhmun tlangpui tar langin, kawlphetha mamawh san lai berin 155 MW mamawh a nih thu te, tui chakna hmanga kawlphetha siamchhuah zat 29.35MW a nih thu te, ni zung chakna hmanga kawlphetha siamchhuah theih zat 3.85 MW a nih thu leh kum 2021-22 chhungin solar power 3.39MU siam chhuah a nih thu a sawi.
Power secretary chuan Mizoramah hian 2MWp Tlungvel Solar Plant, 1555kWp rooftop solar bakah Sihhmui, Melriat leh Khawivaah Grid Connected Solar Plant 100kWp theuh a awm thu a tar lang a. 20Wp Solar Park Vankal chu March 2023 ah zawh theih beisei a nih thu leh 10MWp Solar Project Keifang chu June, 2022 hian zawh tum a nih thu a sawi bawk.
Agriculture additional director pawhin Mizoram hectare khat zelah chemical fertilizer 70 kg zel hmang thin anga chhut a ni. Fertilizer whole sale dealer 19 leh retail a hralh chhuahna dawr 67-te chuan Mizoram puma fertilizer mamawhtu lo neitute an chawm mek thu te, Mizoramah 26,730 ha-ah oil palm chin mek a nih thu leh district pasariha khaw 197-ah oil palm chin niin sorkar thawhpui company-te chuan kg 1 zelah Rs. 10 huin lo neitute hnen atangin an lei thin thu a sawi.
Tourism Director Lalengmawia Vantawl pawhin thutkhawmah hian tourism-a Mizoram hmalakna hrang hrang a tar lang a. Zin mite tana Mizoram tlawh a châkawm chhan te, Responsible Tourism Policy an neih thu leh an hmachhawp thenkhat te a sawi a ni.
Union minister hian nimin vek khan chemical fertilizer zawrhna dawrte a tlawh nghal bawk.