Congress hruaitu hlun, party-a nihna pawimawh tak pahnih chelhtu, Kamal Nath-a chu an party-in ‘mi pakhatin nihna pakhat chelh’ an kalpui angin Madhya Pradesh-a an party Legislature Party hruaitu ber a nihna chu a kalsan.
Assembly-ah opposition leader a ni zui dawn ta lo tihna a ni a, an state Congress chief nihna erawh a chelh zui ang.
Ningania thuchhuah an siamah Congress chuan a nihna pakhat zawk atanga a bânna chu party chief Sonia Gandhi-i’n a pawm tih an tar lang.
An hruaitu hlun, KC Venugopal-a’n thu a chhuahah chuan Dr Govind Singh-a chu Legislature Party leader a ni dawn tih a tar lang bawk.
CLP leader thar, Dr Singh hi Bhind district, Lahar bial atanga MLA vawi sarih ni tawh niin Jyotiraditya Scindia-a lenna, Gwalior-Chambal bawra mi tho a ni a. Chief minister hlui, Digvijaya Singh-a nena inzui nasa tak a ni.
“Tun hmain assembly-ah hian mipuite tana tha tur ka lo au chhuahpui fo tawh a, CLP leader ni chungin ka chhunzawm zel ang,” a ti.
“Kamal Nath-a hi a bâng a ni lo va, mawhphurhna min tawmtir a ni mai a. Thawk dunin ani nen hian mipuite laka BJP sorkar chet dan kan thlir zel ang,” a ti.
BJP erawh chuan he thil hi party chhung buainaah an puh a. State BJP media convenor Lokendra Parashar chuan, “Nath-a thla chu khirhsak niin Govind Singh-a CLP leader-a ruat hian MP Congress-ah Digvijaya Singh-a hun a intan leh ta tihna a ni a. Nath-a hi naktuk lawkah Congress chief atang pawhin a bâng zui thei a ni,” tiin Twitter-ah a tar lang.
State BJP secretary Rajneesh Agrawal pawhin CLP leader atana Kshatriya politician ruat a nih chungchang hi a sawi chhuak a. “He thil hian Congress-in SC, ST leh OBC dinhmun thlirin politics a khel leh ta tih a lantir a, chanvo lian chelh turin an ring zo lo,” tiin a tar lang.