Season thar a Premier League khel tura kaisang tur pahnih an chiang tawh a. Thawhlehni zanah AFC Bournemouth chuan huntawp dawnah Nottingham Forest lakah chakna goal an khung a. EFL Championship-ah pahnihna an hauh chiang.
Vitality Stadium a inkhelah Cherries tan substitute Kieffer Moore chuan huntawp dawnah chakna goal a khung a. An freekick pet atanga ball kal chu vengtu nei lova awm a la in goal-ah a khung.
Forest hi chak se Bournemouth nen dinhmun inang chiah tur an ni a, league match khelh khat an la hmabak ang. Mahse an tlawm avangin Premier League kaisang turin Championship play-off an khelh a ngai dawn a, pathumna atanga parukna in playoffs hi an khel ang.
Cherries hi manager Scott Parker hovin an kaisang a, Parker hi kum 2019-20 season a Fulham kaisanpuitu niin season tan tir khan Bournemouth hi a zawm.
Fulham an champion
Thawhtanni zanah Fulham in goal sarih khungin an champion-na an tichiang a. Lehpelh theih an ni tawh lo.
Cottagers tan Aleksandar Mitrovic chuan goal hnih khungin, Tom Cairney, Kenny Tete, Fabio Carvalho Bobby Decordova-Reid leh Jean-Michael Seri ten goal khat theuh an khung a, 7-0 in Luton Town an hneh.
Fulham in hneh taka an champion zanah Mitrovic-a’n record a siam a. Tun season-ah goal 43 a khungna niin EFL season khata goal khung hnem ber record a siam.
Goal hmahruai khungtu Tom Cairney chuan tun season a Fulham goal 100-na a khung chiah bawk.