Manchester City striker Gabriel Jesus chu Arsenal in lakluh an duh a, nipui a insawn turin inbiakna an kalpui tih a agent chuan a sawi.
Kum 25 mi Jesus hian Etihad Stadium-ah kum khat contract a la nei a, thla hmasa a Watford laka goal li a khung tumin inkhel zawhah a hma hun chungchang zawh a ni a, club chhuahsan lam a sawibo duh lo.
Thawhlehni khan Manchester City in Borussia Dortmund atangin Erling Haaland an lakluh tur thu an puang a, nikum nipui atang striker thar nen sawizawm an nih fo avangin Jesus-a tan first team hmun nghet chan a har tawh dawn niin mi tam takin an ngai.
A agent Marcelo Pettinati chuan, “Arsenal nen ani chungchang hi kan sawi tawh a, amah pawhin Arsenal a team thar an duan mek hi tha a ti. Heti lam pawh hi kan la ngaihtuah zel ang. Club dang paruk in Gabriel hi an ngaihven a, Man City tana match la awmte ah a insawrbing rih anga, a hnuah ngaihtuahna kan seng ang.” tiin a sawichiang.
Arsenal manager Mikel Arteta hnuaiah Jesus hian Manchester City assistant manager a nihlaiin kum thum a khel tawh.
North London club hian season tharah striker lakluh an duh a, an captain Alexandre Lacazette chu chhuak tura ngaih a ni bawk.