Northeast Frontier Railway chuan karleh atang hian India hmarchhaka zinmite tana nawmsakna tur leh awlsam zawk nan special AC train an tlan tantir ve dawn ta.
Hei bakah hian New Delhi, Mumbai, Chennai leh Bangalore zin duh tan pawh kawng an hawng dawn bawk.
Chawlhkar khata vawi hnih kal tur, AC special train hi Dibrugarh – New Delhi – Dibrugarh via Bogibeel kawng zawhin Thawhtanni atang hian a tlan tan ang.
Hei bakah hian AC special train dang, chawlhkar khata vawi hnih tlan tur bawk, Dibrugarh – New Delhi – Dibrugarh chu Ningani atang an tlan tantir dawn bawk.
AC special train dang, Kamakhya – Yesvantpur – Kamakhya kawng zawh tur leh Kamakhya – Lokmanya Tilak Terminus – Kamakhya kawng zawh tur, chawlhkar khata vawi khat tlan tur chu Nilaini atang hian an tlan tan bawk ang.
NEFR chuan hmarchhaka rel hmanga zin thinte chuan heng rel thar hmang hian nuam zawk leh awlsam zawkin an zin thei tawh dawn niin a sawi.
Heng rel tlantir thar turah hian reserved coach a awm dawn lo va. Coronavirus hri leng mek avangin fimkhur taka thil kalpui tur niin passenger-te chuan Aarogya Setu App an hmang vek tur a ni a, station leh rel chhungah mi dang hlata awm tura tih vek an ni.
Station-a luh leh chhuah dawnah hmai tuam vek tur a nih bakah kalkawngah pawh tuam tura tih a ni a. Natna lang chhuak lote chauh rel station lutin relah pawh an chuang thei ang.
Indian Railways chuan nikum March thla tawp atang khan Covid-19 leng avangin passenger phur rel chi hrang hrang chu hian a dintir a. Tunah erawh an chhunzawm leh vek tawh thung a ni.