Sri Lanka-a an eibar dinhmun hniam lutuk avanga mipui thinrimin sorkar an nawrna kal zelah sipaite chu hmet mit tura tirh chhuah niin pawikhawihte kah zelna thupek an keng tel bawk.
Ram pumah buaina tihreh nan curfew puan ni mah se Thawhlehni zanah pawh hmun hrang hrangah inhawr khawma thil hal a tam leh hle tho.
Colombo khawpui bula dawrte chu hal a ni a. Prime minister hlui, Mahinda Rajapaksa fapa ta resort hal a ni bawk.
Prime minister hlui hi tuialhthei leh ei tur an tlakchhak avanga mipuite thinrimin nasa taka an nawr hnuah bângin tuipui sipai hmunah a tawm mek.
Thawhtanni atanga tharum thawhna thleng tanah mi pakua an thi tawh a, mi 200 chuangin hliam an tuar tawh bawk.
Prime minister hlui nau, President Gotabaya Rajapaksa bân phuta pungkhawm mipuite chu sorkar thlawptuten Thawhtanni khan beiin heta tang hian tharum thawhna hi a thleng zui a ni.
Zan lamah an khawpui ber, Colombo hmar lamah buaina chhuak zankhuain Negombo-ah chuan inep pawl hnihte hian dawr an hal a ni.
Sri Lanka ram hi chawlhkar tam tak chhung an ram sum leh pai dinhmun hniam duh lohna lantirna avangin an buai tawh a. An pawisa hlutna nasa takin a tlahniam a; ei tur, tuialhthei leh damdawi an tlachham nasa hle.
Thawhtanni zan khan politician-te in 50 chuang hal a ni a, heng zingah hian an ram chhim lam, Rajapaksa chhungkaw khua, Hambantota-a museum an din pawh a tel.
A ni thum nan, Ningani zing thleng curfew puan a nih avangin Nilaini pawh khan dawr, sumdawnna hmun leh pisate khar a ni leh.
Venhimna lama hlauhthawn a awm avangin political party hruaitute thutkhawm pawh online hmanga neih a ni.
Colombo-a kawtthlerah chuan police thahnem tak an awm a, sipai hmuh tur an awm a, Thawhtannia buaina chhuak hnuhma – bus hal leh thil chhia hmuh tur a tam hle bawk.
Police-te chu dan bawhchhia leh thil rute chu hmuh ruala kah phalna pek an ni.
Colombia-ah hian sorkar duh lohva punkhawmna hmun lian ber, Galle Face Green-ah erawh mi an pung khawm tho va. President Rajapaksa-a chuan an ram eibar dinhmun a enkawl thiam lo va, bâng se an duh.
Ani hi Rajapaksa chhungkaw zinga nihna sang la chelh awm chhun niin prime minister atanga a u a bân hnuah pawh mipui thinrim a la reh chuang lo a ni.
Thawhtanni zana Colombo-a a chenna in atanga an nawr chhuah hnuah an ram hmarchhak lam, Trincomalee Naval Base-ah Mahinda Rajapaksa chu a chhungtte nen an tawm nia hriat a nih avangin Thawhlehni zan khan he hmunah hian mi tam tak pungkhawmin duh lohna an lantir leh.
Defence lama thuneitu sangte chuan Nilaini zing khan an hmunpuiah an awm tih an puang ta bawk.
Mahinda Rajapaksa hi a tirah chuan India-ah a tlanchhia nia sawi a ni a; mahse, Colombo-a Indian High Commission chuan a pha a ni.
Thliarkar ram buaina bul a lian, sorkar mawh
President Rajapaska chuan an ram mipuite hnenah hian an ram dinhmun siam tha leh turin political party dangte dawrin tangrual sorkar siam tumin hma a la mek niin a sawi a; mahse, eptu party lian ber chuan president ber a bân hma loh chuan sorkar lailawk siam tumnaah an hian an tel dawn lo tih a sawi.
Tuna a lan danah chuan eng political party mah sorkar intawm siam tumnaah hian tel tum an awm hriat a la ni lo.
Politics-a an buaina hi Sri Lanka hian International Monetary Fund (IMF) atanga an ram chhanchhuahna tur $ tluklehdingawn 81 zet an neih a ral tep atanga intan a ni.
Ram danga pawisa ba an neihte an pe lo va, hei hi a chhan lian ber chu China atanga service loan an lak thin, Beijing-in infrastructure project lian tak tak a thawhna an hmuh loh vang a ni.
Hripui a leng a, an sum hnai pakhat ber, tourism sector lamah an che thei lo zui a. Heng hi a chhan lian ber pakhat chu sorkar hotuten intihlar an tum lutukna lama kum 2019-a chhiah lak an tihhniam vak leh kum 2021-a chemical fertiliser hman khapa thlai an thar thin a tlem tak vang niin an puh a ni.