AIZAWL: N. Mualcheng khawtlangin an sum thawhkhawm hmangin an khaw chhuak, K. Vanlalvena Rajya Sabha MP atana thlan tlin a nih an lawm a, VCP F Lalbiakdika’n an khaw laili-a K. Vanlalvena chawimawina Lungphun a hawn hnuah Community hall-ah hun hmang zuiin, tlai ah khawtlangin ruai an theh a ni.
K. Vanlalvena chuan, khawtlangin sum thawhkhawma MP a a tlin an lawmsak avangin a lawm takzet tih a sawi a. “Kum 40 kaltaah khan N. Mualcheng Community hall-ah hian pawl 5 kan zir thin a, vawiinah a hmun ngaiah ngei khawtlangin MP-a ka tlin min lawmsak hi a ropui dangdai hle a ni, a ti.
MP ni tura a kalkawng sawiin, K. Vanlalvena chuan MNF party-ah chanvo hrang hrang a chelh chhoh ve hnuah MP ni tura hun tha hawnsak a nih thu a sawi a. “MP candidate ni tura nomination file na tur Rs 4000 pawh kan hotu ten min peksak a, thenrual tha ten min lawmpuina tur chawhlui kilhona tur thlengin pawisa min pe” tiin, Pathian leh MNF party president Zoramthanga leh party hruaitu dang te, MP atana vote tu MLA te chungah a lawm hle tih a sawi.
Rajya Sabha MP K Vanlalvena chuan N. Mualcheng khaw tana NABARD sum Rs. vbc 860 hmanga tuilak hna thawh tan thuai a nih a beisei thu sawiin, Mo- del village (SAGY) ata- na a thlan chhan leh Model village kalphung te a sawifiah bawk.
N Mualcheng VCP Lalbiakdika’n Rajya Sabha MP atana K Vanlalvena thlan a nih tirh atanga khawtlangin ropui taka lawm an tum nghal thu leh hri leng vanga an tum anga thil a kal tak loh thu sawiin, MP thar an lawm tlai deuh chhan a sawifiah a. K Vanlalvena chu khawtlangin an lawmpui a, an chhuan takzet avangin mipui ten phal takin a lawmna tur sum pawh an thawhkhawm niin a sawi.
Hun reilote chhunga Mualcheng khaw tuilakna tur sorkar laipui lama a nawrchhuahsak thu VCP chuan sawiin, Model village atana a thlangte chu kumkhuaa an theihnghilh tawh loh tur hmasawnna ropui a nih thu a sawi bawk.