AIZAWL: Urban Development & Poverty Alleviation (UD&PA) department hotu ten nimin khan Larsap Hari Babu Kambhampati hovin khaw lian deuha hmasawnna ruhrel lian tak tak UD&PA department-in a khawih mek chungchang an sawiho a. Khawpui cheng miharsate tana in sak tanpuina kalpui mek chungchang an sawiho bawk.
Larsap chuan UD&- PA hnuaiah chak taka hmasawnna ruhrel te siam mek a nih avanga lawmawm a tih thu sawiin, project pawimawh tak tak te chu mipuiin an chhawr tangkai thuai theihna tura tan la turin thawktute a chah a. PMAY (U) kalpui danah pawh hna a tha tawk nia a hriat thu sawiin, sorkarin a thawhna tur sum department hnena a thun ve leh khawmuang lova project kalpuitu ten chak taka hna an chhunzawm erawh a ngai nia a hriat thu a sawi.
PMAY(U) kalpui chu khawpuia cheng miharsa, in hmun nei te chauh tana in sak tanpuina ni bik lova, in hmun la neilote pawh huam tir dan zawn ni se a duh thu Larsap chuan a sawi bawk.
Sorkar thuchhuahin a tarlan danin UD&PA hnuaia hmasawnna ruhrel thawh mekah Rs vbc 5 aia tam senna tur project lian 9 leh a laihawl Rs vbc 1–5 senna tur project 12 leh project tenau 1024 a awm mek a. Aizawl khawpui tawt lutuk tihziaawmna atana lirthei hunna siam hna PAHOSS pawh chak taka kalpui niin, Rs. nuai 1,144.30 pekchhuah a ni tawh a, hmun 15-ah lirthei hunna tur siam zawh fel a ni tawh. Aizawl khawpui bikah AMRUT hnuaiah khawpui tihhmasawnna atan Rs vbc 140.25 (Central assistance – Rs. vbc 126. 22 leh state-in a doletna Rs. vbc 14.025) project thawh mek a ni.
NERDUP kaltlanga SIPMIU-in tui thlianghlim in tur lak, tuichhe paih leh sawngbawl thianghlim, bawlhhlawh sawngbawl leh khawpuia chengte khawsak phung tihawlsamna leh tihhmasawnna atan te Rs vbc 662 chuang hman a ni bawk.