Sports Minister Robert Romawia Royte chuan Nilaini tlai khan State Training Centre, Tanhril-a, 1st Mizo Air Squadron NCC, Combined Annual Training Camp nei mek te, Cultural Night leh Camp Fire a hmanpui.
He hunah hian NCC Cadet hrang hrang ten hnam lam chi hrang hrang leh an thiamthil te an entir a, an camp chhunga an thil zir chhuahte phochhuahna hun an hmang a. Cultural program neih zawh anih hian Camp Fire chhitna hun hman ani.
Sports Minister Robert Romawia Royte chuan, Cadet te chu an camp chhunga an thil zirte hre renga, an hma hun atana tangkai taka hmang turin a chah a, Mizoram chhim lam district 4 te huam turin Lunglei ah 2 Mizo Battalion NCC din anih tur thu leh Cabinet-in a pawm vek tawh thu sawiin, kumin July thla hian kalpui tan tura ruahhmanna peih fel anih tawh thu a sawi.
1st Mizo Air Squadron NCC Combined Annual Training- Camp-ah hian Mizoram district hrang hrang school leh college 24 atangin Cadet 400 chuang telin, Mizorama cadet awmte chu an tel kim hle a ni.
Khuallian hian tun Combined- Annual Training Camp-a tel, school leh college zawng zawngte hnenah Football pahnih, Volleyball pahnih leh net pakhat theuh a pe a ni.