Mizoram Football Association (MFA) buatsaih football hmanga Veng leh Khua te inna lian LBS Suzuki All Mizoram Inter Village Football Tournament 2022 chu June ni 29, Nilaini khan khelmual panga; AR Lammual, MZU Ground, RG Stadium, MFA Ground Sairang, Lengpui SMC Ground leh MZU Ground-ahte khelh chhunzawm a ni a. Mizo footballer lar R. Laldanmawia hova inlan Sialhawk chu Lengpui SCM lamah an tal na viau a, 5-1 in Tuikual North an hneh. Inkhel dangah Champhai Kanan chuan awlsam takin hnehna an chang a, Tuithiang pawhin Biate an sawp ve bawk.
Danmawia dan a har
R. Laldanmawia hova inlan Sialhawk chuan Lengpui SMC-ah Tuikual North an hmachhawn a, 5-1 ngawtin hnehna an chang. He inkhelah hian Danmawia hian goal hnih a thun. Aizawl Veng lian lakah Sialhawkin bul an tan tha a, minute 18-naah R. Laldanmawia chuan hmahruaina goal a thun. Minute 23-naah Rotluangliana’n an goal hnihna a thun hnuin Danmawia hian minute 31-naah an goal thumna a thun zui leh a. Minute 41-naah Tuikual North tan Lalnundika chuan goal thunin an si phurh a sut then a. Sialhawkin 3-1 a hmahruai chungin chawlhlawk an hmang.
Chawlhlawk hnu lamah Sialhawk an khel tha chhunzawm a, Lalmuankima leh Rotluangliana ten goal thun belh zui leh in, Tuikual North lakah 5-1 in hnehna an chang zui ta a ni.
Lengpui SMC a inkhel dangah Champhai Kanan Veng an khel tha viau a, an khingpui Thenzawl East chu 10-2 ngawtin an sawp. Champhai Kanan tan hian R Ramdinthara chuan minute khatna lekah hmahruaina goal a thun nghal pang a. He goal hi inelna neih mekah goal lut rang ber a ni. R. Ramdinthara hian goal nga ngawt a thun belh zui leh bawk a, Thenzawk East lakah double hattrick a siam hial a ni. An goal li dang hi Laltlanzova (goal hnih), Lalramsanga leh H Lalmuankima te thun a ni ve thung. Awlsam taka Cham-phai Kanan in hnehna an chan lai hian Champhai inelna liana champion hlim Melbuk chuan 2-1 in Lamzawl an hneh ve bawk.
Lengpui SMC a inkhel hnuhnung berah Tuithiang chuan 6-1 Biate an hneh a. Tuithiang tan hian M Lalpektluanga chuan goal li a tun a, an veng a chakpui chiang hle.
Nilaini-a Sipai Lammuala inkhel hmasa berah a, Venghlui chuan 4-1 in North Chaltlang an hneh a. Melthum leh Selesih ten hnih faiin an khingpuite ve ve an hneh a. Hetihlai hian hun pangngai 2-2 an inhnehtawk hnuin Sesih chu penalty shoot-out ah an vanduai a. An khingpui Samtlang lakah 4-2 tlawm zawkah an tang.
MZU Ground lamah Group B a mite an inlan chhunzawm ve thung a. Nilaini a inkhel hmasa berah Saron Veng chuan 6-0 in Buangpui an sawp a. College Vengin 4-1 a Thinghlun an hneh laiin Durtlang an vanduai a; penalty shootout ah Thenzawl West VC chu 4-3 in an hneh lo. Durtlang leh Thenzawl West te hi hun pangngaih 2-2 in an inhnehtawk a. Tie-break-ah Thenzawl team an vannei ta zawk a ni.
RG Stadium lamah Group B a mite an inlan bawk a, nilainia inkhel hmasa berah Hlimen chuan 8-3 in Lengte an sawp a. Hlimen tan hian Rampianmawia chuan hattrick a siam. Inkhel dangah Ramhlun Venglai in 4-1 in Lungkawlh an hneh a. Falkawnin 5-1 a West Bunhhmun an hneh bakah New West Phaileng chuan 2-1 in Chawilung an hneh ve bawk. MFA Ground a inkhelah Bilkhawthlir N’ chuan 3-0 in Nursery Veng an sawp ve bawk.