AIZAWL: Assembly Speaker Lalrinliana Sailo-in Zorinpui Zirtawpni khan ramdang nena insumdawntawnna kawt- chhuah tur Lawngtlai district-a Zorinpui tlawhin, Lawngtlai atanga Zochachhuah inkara Kaladan multi modal transit transport project (KMMTTP) kawngpui sial mek leh Myanmar ram chhung lama kawng laih hnathawh mek te a enfiah.
Lalrinliana Sailo chuan Mizoram chhung bika KMMTTP kawngpui sial mek chu tha thawkhat a tih thu sawiin, hna an zo titih tawh chu lawmawm a tih thu a sawi a. Zochachhuah atanga Myanmar (Kaletwa-Paletwa) kawng laih hna a muang lutuk leh tun thlenga hmalakna mumal a awm lo erawh pawi a tih thu sawiin, thuneitu sangte hne- na bawhzui a tum thu a sawi.
Sorkar thuchhuahin a tarlan danin, Lawngtlai atanga Zochachhuah inkar KMMTTP kawngpui sial mek chu hna za-a 96.4 zawh tawh niin, lei 8 dawh turah 6 dawh zawh tawh a ni a, la dawh zawh loh hmun hnihah a awm. KMMTTP kawngpui Mizoram chin chu kum 2010 atanga thawh tan niin, kumin December-a hawn hman tum a ni.
Zochachhuah atanga Kaletwa inkar chu km 48 leh Kaletwa atanga Paletwa inkar km 60 a thui niin, Ministry of ex- ternal affairs enkawlna hnuaia Engineering projects (India) ltd. RKR- PP (JV) Company-in an thawk a. He kawng hian Myanmar ram chhunga khaw 24 a paltlang ang. Pilot cutting km 21 vel kawng sial a ni tawh a, Mizoram sorkar kaltlanga hnathawh a nih loh avang leh Myanmar ram buai avangin beisei angin hmasawnna a kal chak thei lo niin sorkar thuchhuah chuan a tarlang bawk.