Borussia Dortmund chuan Ivory Coast international Sebastien Haller chu Ajax atangin an lalut fel a, an tlarhmaah Erling Haaland-a hmunruak an luahtir ang.
Haller hian Eredivisie champion hnenah thla 18 hlawhtling tak a hman hnuah German football-ah a kir leh dawn a, Dortmund hmatawng rinrawl nih a tum dawn.
Season liamta khan match 42 atangin goal 34 a khung a, UEFA Champions League bikah goal 11 a khung.Chiang zawkin
Dortmund hian a manah Euro maktaduai 31 an pe tla nghal dawn a, kum 28 mi hi a khelhdan a zirin Euro maktaduai 3.5 an pek belh a ngai dawn.
Season liamta a Bundesliga a pahnihna hauhtu hnenah hian kum li contract a ziak.
Hallers chuan, “Stadium ropui tak an nei a, mahse stadium ropui hi fans tel lo chuan engmah lo mai a ni. BVB chhungkua a ka tel avangin mi 80,000 chuangin min thlawp thinna chu han hriat ka chak tawh a, kan hma hunah hlawhtlinna tam tak kan neih ka beisei.” a ti.
West Ham United a beisei anga a chet loh hnuah Haller hian Ajax tan match 66 atangin goal 47 a khung a. Season liamta khan match 7 atang UCL goal 11 a khung a, Cristiano Ronaldo tih lova group match zawng zawng a goal khung thei awmchhun a ni.
Bundesliga tan mikhual a ni lova, Eintracht Frankfurt tan kum 2017 leh 2019 chhung khan match 60 khelin goal 20 a khung tawh.
Haller hi tun nipuiah Dortmund in an squad tichak tura player thar an lakluh pasarihna a ni a, sum hlawm lian senga attacker an lei pahnihna a ni.