Australian tennis star chanchin ngah tak Nick Kyrgios chuan a vawikhatna atan Grand Slam singles semi-final a lut a. Wimbledon final luh chuh thei turin Cristian Garin chu straight set in a hneh.
Kyrgios hian Nilaini khan a khingpui Chilean hi -4 6-3 7-6 (7-5) in a hneh a, kum 2005 hnua a vawikhatna atan Australian mi SW19 a a sang pali zinga tel leh thei hmasa ber a ni a. Zanin dar 8-ah Rafael Nadal nen an inkhel ang.
Kum 8 kalta khan Kyrgios hian Wimbledon quarter-final a vawikhat nan a lut a, hemi hnuah hian a aia thui a la thleng leh ngai lo.
Court One a inkhel pawimawhah a khingpui lakah a buai lem lova. Hun pawimawhah a che sual lo thin bawk.
Break points a hmachhawn vawi 9 atangin tum riat a dang hlawhtling a. Grass court ball tleng chaknaah ace vawi 17 vaw bawkin a first serve atang 73% point a hmu thei.
Kum 27 mi Kyrgios hi professional tennis a luhchilh atangin sang tak thleng thei tura talent nei a ngaih a ni a, beiseina a chungah a sang thin.
Nimahsela a nungchang leh court chhunga a chetdante avangin beisei a thleng pha lo fo thin a. Tennis ropui tak a khelh chang leh a chetsual nasat a inpawlh nasa thin.
“Tunhnai kum hnih chhung velin mi zawng zawng zawt ula, tun hi ka thlen theih an ring lovang. Mahni inthununna, tumruhna leh taksa chakna a nei tawk lo an ti ang. Keimah ngei pawhin pawn lam thawm neuh neuh avang hian ka thei ang em tih hi ka chiang ngam lo fo thin.” tiin a chak hnuah a sawi zui hial.A hma a ding tur Nadal
Champion tura rinkai zing ami Rafael Nadal chuan semi-final lut turin harsatna paltlang a mamawh a, Taylor Fritz chu inkhel hautak takah a hneh.
Set hnihna an khelh zawhin Spanish mi hi medical timeout la in enkawl a ngai a, a chet zawngin harsatna a nei tih an inkhelh laiin hriat mahse 3-6 7-5 3-6 7-5 7-6 (10-4) in a chak ta tho.
Round of 16-ah pawh a taksa chung lam chu uluk taka tuam chungin a khel tawh a, quarter-final inkhelah hian a hliam ngai vang bawkin a na leh.
Inkhel zawhah kawm a nihin engtinnge i khelh tluan theih tia zawhna an zawh chu a hriat bik loh thu in kum 36 mi hian a chhang hial.
Inkhel zawh lamah Nadal-a taksa a hliam hi endik a ni a, Ningani khan tihrawl hliam a nei tih hmuhchhuah a ni a. Inhnuhdawh erawh a la tum lo.
Zanina an inkhelh hmain vawiinah a hliam hi ennawn a ni leh dawn a. Amah Nadal chuan, “A pawimawh ber chu a nat belh emaw chet a harsat zual phah em tih ngaihchan phawt a ni.” a ti.