California-a ram kang chuan huam zau telh telh zelin Yosemite National Park-a khawvela thingkung sang ber ber, sequoia-te chu dinhmun hlauhawmah a dintir mek.
Washburn Fire hi darkar 24 liam ta chhung khan a leta zau kang hmanin ram acre 1,591 vel a tuam tawh.
A ram a chhengchhiat em avangin kangthelhtute chuan khawvel thing lian leh upa ber berte chhan hna hi an thawk hlei thei lo.
Ram a kanna hnaiha chengte riak (camper)-te chu hmun himah sawn chhuah an ni a, a bul hnai vel boruak pawh a khu avanga chhe hle tawhin a park mawi tak thlir theih thin pawh thlir hleih theih a ni rih lo.
July 7-a intan ram kang hi Mariposa Grove an tiha sequoia lian tak 500 vel tan a hlauhawm phak a, heng zingah hian Grizzly Giant an tih, kum 3,000 vela upa thing pawh a tel.
Tun dinhmunah erawh chuan heng thingkung zinga mi hi tihchhiat erawh a la nei lo.
Yosemite fire & aviation management department chuan tui phuh chhuahna (sprinkler system) an siam hmangin heng thingte hi venhim a ni tih an sawi a, tui phuh hian boruak a tihnawng a, a bul vela kangmei man kai theih thilte a tiziaawm thin tih an sawi.
Washburn Fire avang hian mi 1,600 dawn inthiar chhuak an awm tawh a, heng zingah hian national park chhunga veng pakhat, Wawona-a mite pawh an tel a. A bula camp eng emaw zata riakte an chhuak bawk.
Kangmei chhuah chhan hi chhui mek zel a ni a. Fire thuneitute chuan khaw lum leh boruak ro lutuk chuan mei a intiman kai chak zual niin an sawi.
Sequoia kung lian tak takte hi khawvela thingkung lian ber berte an ni hlawm a. A sang ber hi metre 83 (275 feet)-a sang niin a bul thutah teh kualin metre 11 (36 feet) chuang a ni.
An dam rei thei em em a, kum 3,000 vel thleng an dam thei a, khawvela thil dam rei ber zinga mi an ni mek.
Mariposa Grove hi American chanchinah hum pawimawh tak luahtu a ni tel a, a hmunhma hi an ram sorkarin ‘vantlang hman atan, resort leh intawllenna’ atan hmun a phalsak hmasa ber niin kum 1864 daih tawh khan President Abraham Lincoln-a’n a hming a ziah hnan a ni.
Nikum khan California-ah hian ram kangah tho sequoia kung lian tak takte tihchhiat a lo ni tawh.
Thuneitute chuan kuminah hian United States-ah ram kang 35,000 chuang a awm tawh niin an sawi a, hei hi a nih dan thin pangngai aia tam daih a ni.
Sik leh sa inthlak nasain khaw lum leh khawkheng nasa tak a thlen avangin ram kang hi a chhuak hma zual a ni.