Kar kal taa thah tak, Japanese prime minister hlui, Shinzo Abe chu Thawhlehni khan Tokyo khawpuiah an ram mipuiten ui tak chungin an thlah liam ta.
Kum 67 mi, Abe-a hi Zirtawpni khan an ram chhim lam, Nara khawpuia inthlan tur atana campaign-a a feh chhuahnaah kah hlum a ni.
Thawhlehniah hian a ruang phurtu lirthei kalkawng tluanah an ram mipuite intlarin an thlah a, an rama hmun pawimawh tak takte paltlangin vuina hmun panpui a ni a, phum a ni.
A hmain chhungkaw puala vuina hun chu Zojoji temple-ah an hmang tawh bawk.
Tokyo pumah an flag-te hu a ngul chanvea zar a ni a, temple pawn lamah pawh hetiang tho hian tih a ni a, suntute hi tlar hniha intlarin thenkhat chuan pangparte an keng bawk.
A ruang phurtu hian Abe-a telna, Liberal Democratic Party (LDP) headquarters kal pelin prime minister chenna in an thleng a, hetah hian Prime Minister Fumio Kishida leh MP dangten an lo dawngsawng a ni.
Kum 1993 atanga member a lo ni tawhna, parliament building kal pelin Kirigaya Funeral Hall an thleng zui a ni.
Abe-a vuina hun hi a thian hnai leh chhungte chauh telna tura duan a ni a; mahse, Japan ram pumin khawlaiah an hmanpui a ni ber.
Zing hma tak atangin an chhungkaw puala an vuina, Tokyo lailia temple lian tak, Zojoji-ah chuan mi an pungkhawm tan tawh a ni.
Khawchin zirtuten ruah tam tak sur thei angin sawi lawk mah se amah thlaha pawna a ruang phur chang an tam hle tho.
Chawhnu dar 2:30 (India-a chhun dar 12:00) atangin Zojoji atanga Parliament building inkarah hian mi an intlar tan tawh a ni.