Sri Lanka-a an eptu party lian bera an hruaitu, Sajith Premadasa chuan Rajapaksa hi a bâng a nih chuan president inthlan a chuh dawn tih a sawi.
A kaihhruai, Samagi Jana Balawegaya (SJB) party chuan an thawhpuite dawra an thlawp tur thu an hrilh hnuah chuh hi a tum dawn tih BBC hnenah a sawi a ni.
Premadasa chuan an party leh a thawhpuite nen an sawiho hnuah ‘president thutthleng hi a ruak a nih chuan chuh tura hming pe turin thutlukna an siam’ tih a sawi.
Kum 2019-a president thlannaah khan a chak lo zawkah a lo tang tawh a, tun tum inthlanah pawh hian hnehna chang tur chuan tangruala rorel lai party MP rualte thlawpna a mamawh dawn a ni.
Tun hma atang tawhin Premadasa hian tun hnaia an ram mipuiten an huat ber ni rih mek, Rajapaksa leh an chhungkua chu nasa takin a lo bei tawh thin a. Rajapaksa chhungkua hian kum 20 chuang an ram an lo hruai tawh a ni.
Premadasa chuan party tin telna sorkar dina tel turin a inpeih tih a sawi.
SJB hruaitu hi an ram a buai tan tirh lam, April thla khan prime minister ni tura tih a ni a; mahse, a hnar a, sawisel pawh a hlawh phah a. A elpui, Ranil Wickremesinghe chu ruat a ni a, ani pawh hi an ram boruak inmung mekah party tin telna sorkar din a nih theih nan a bâng dawn a ni.
Premadasa chuan Sri Lanka ram dinhmun mek chu ‘ngaihdan mumal neih theih lohna, nghet lo leh chiang lo leh mi pakhat rorelna’ ram ang a nih thu a sawi a. ‘Thawhhona, inrawn khawm, tum mumal lam pan leh tanrual an mamawh’ niin a sawi.