Aizawl : Kolasib district MJA member ten Larsap Haribabu Kambhampati thurawn bawhzuiin, Inrinni khan Khamrang leh Vairengte inkar NH-306A an tlawh a, he kawng dinhmun an hmuh dan te ziakin Larsap hnenah an thlen ang.
June ni 8, 2022-a Larsapin Kolasib a tlawh khan Kolasib district MJA chuan NH & infrastructure development corporation ltd. (NHIDCL) hnuaia contractor te kawng siam leh hnathawh a tlo loh thin avanga a tul anga bawhzui tura ngenna ziakin an lo thlen a. Larsap chuan kawng chhia te chu enfiah a, a dinhmun te a hnena thlen leh turin thu a lo rawn a ni.
Khamrang leh Vairengte inkar kawng NH-306A hmun thenkhat lai chu a chhiain, lirthei tana kal harsa khawp a awm nual niin a tlawhtu Kolasib district MJA member te chuan an sawi a. Kumin kumtira thawmthat lai te pawh a chhe leh nual tawh niin an sawi.
Vairengte leh a chh- ehvel kawng chhe zual lai chu NHIDCL hnuaia contractor RATNA constructions pvt. ltd-in rora leh leivung hmangin an chhilh tha mek niin an sawi bawk.
Kolasib district MJA member te chuan N. Chhimluang leh Vairengte khaw daia Kuhva leh Leitha (fertilizer) dahkhawmna Kudam te pawh an tlawh nghal a. Heng kudam-ah te hian khawchhak lam atangin Kuhva a thleng deuh reng nia thu an sawn thu an sawi a. Kuhva ro te chu a khat tawkin phailamah phurhthlak thin a nih thu leh Kudam-ah hian fertilizer bag thahnem tak a awm thu an sawi bawk a ni.