Mizoramah BSNL hnuaia Mobile phone connection nei 259455 leh landline phone connection nei 6926 an awm mek a. FTTH connection nei 7885, Wi-Fi hotspot 15, working broadband 2685, exchanges wired 39 leh BTSs mobile 336 a awm mek bawk.
Telephone Advisory Committee (TAC) an Chairman, Lok Sabha MP C Lalrosanga hova thutkhawmah Mizorama BSNL dinhmun tarlan a ni a. TAC Chairman chuan signal ṭhat loh leh chak tawk lohnate thuam ṭhat tul viau mahse, sum lamah harsatna a awm avanga hmalak a harsat thu a sawi.
C Lalrosanga chuan Mizoram hmun hrang hrangah signal ṭhat tawk loh avanga mobile phone hman harsatna la awmte chu a theih ang anga tihchangtlun leh thuamṭhat a ṭul hle thu sawiin, a bikin ramri dep hmun hrang hranga signal awm ṭhat loh avanga mobile phone hman hleihtheihlohna hmunah te signal ṭha zawk a awm theihna tura ṭanlak thar a tul thu a sawi a. Sum harsa chunga BSNL General Manager leh a thawhpuite inpekna fakin, hma lam pana an thawh zelna turah a ṭul anga theihtawp chhuahpui a inhuam thu a sawi.
TAC Chairman chuan Mizorama inbiakpawhna leh thu thawndarhna lam thuamṭhat a nih zel theihna turin Communication Minister a dawr tawh thu pawh sawiin, BSNL harsatna leh mamawhte la hriattir zel a tum thu a sawi a. Mizorama internet a chak zawk theihna tura bandwidth tam zawk a awm theihna turin Optical fibre cable la thlen lohna district zawng zawng thlen tir tura thuneitute dawr zui a tum thu a sawi.
Mizoramah licence nei mumal lova internet connection pechhuak ṭhin an awm nia sawi chungchangah TAC Chairman chuan dan anga hmalak ṭul a tih thu a sawi bawk.
TAC thutkhawmah hian TAC member - Lalliankima, HC Vanlalruata leh Zomuanthanga te bakah BSNL General Manager hovin officer leh staff ṭhahnem tak an tel a ni.