Ranil Wickremesinghe chu an ram eibar dinhmun chhe tak khai chhuak leh tura hna hautak tak nei chungin Sri Lanka president atan lak luh a ni.
Kum 73 mi hi nasa taka parliament complex ven karah Ningani khan lak luh a ni.
Prime minister hlui, Wickremesinghe hi vantlangah a tla na lo hle sa a ni a; mahse, mi thenkhat chuan hun rei vak lo chhung chu enthlaka an ram a hruai dan ngaihchan tha ve reng rengin an hria.
Tar lan fo tawh angin Sri Lanka hi eibar dinhmun chhe lutuk avanga mipui thinrimna sosang tak karah thla eng emaw zat an awm tawh.
Mi tam tak chuan president atanga chawl ta, Rajapaksa sorkarin sum an enkawl dan a dik loh vangah puhin hetah hian Wickremesinghe ngei pawh a tel niin an ngai a; mahse, parliament-a vote thlak hnua a tlin hnuah pawh khawlaiah amah duh lohna lantirna lian tham a thleng lo thung.
An khawpui berah chuan sorkar hmun hrang hrangte chu nasa taka ven a la ni.
“A lo ding chhuak a, a chet dan chu kan la hmu ang chu! Ei tur, damdawi kan dawng lo a nih chuan khawlaiah kan chhuak leh mai ang,” tiin kar hmasaa sorkar duh loh lantirnaa tel nu pakhat chuan a sawi.
Wickremesinghe-a hi Nilainia parliament-a MP-ten president tur an thlannaah khan an rama rorel lai, Sri Lanka People’s Front (SLPP)-te thlawpna hmu chungin thlan tlin a ni.
A khingpui lian ber, rorel lai party atanga chhuak, Dullus Alahapperuma chu eptuten thlawp mah se vote 134-82 in a hneh a ni.
Wickremesinghe-a hian an ram politics sawh ngheh phawta International Monetary Fund (IMF) atanga an ram khai chhuahna ngaihtuah a tum.
Parliament-ah an ram chuan hun khirh tak a tawn mek thu leh an hmaah chona lian tak a awm thu a sawi.
Mipuiin Rajapaksa nena inhnimhnaih lutuk tia sawia an duh lohna pawh hriain, “Rajapaksa chhungkaw thian ka ni lo va, mipuite thian ka ni,” tiin thlan tlin a nih hnu lawkah thuthar lakhawmtute hnenah a sawi.