Aizawl: MNF President Zoramthanga’n nimin khan Serchhip a tlawh a, Mizoramin MLA inthlanpui a hmachhawn huna Serchhip biala an party candidate tur a puang a, Pathian leh mipui zarah nakkumah MNF-in seat 30 lak tlin ngei an tum thu a sawi.
MNF Serchhip East Block huaihawta Serchhip Auditorium-a public meeting neihah Zorama chuan Serchhip assembly constituency-a MNF party atanga ding turin J. Malsawmzuala Vanchhawng, MNF Gen. Hqrs. Adviser chu MNF Gen. Headquarters-in lungrual takin an pawm a, an thlang tih sawiin, mipui hriatah a puang nghal a ni.
Zorama chuan Pathian leh mipui zarah nakkumah MNF hian seat 30 lak tlin ngei an tum thu sawiin, a dinna tur bial chungchang sawi zawmin, “Bial dang en a tul lo a, East I-ah nghet takin ka awm mek,” a ti.
Eptu party, ZPM kal dan chu kum 2018 inthlan hmaa an insawi dan leh inthlan hnua an awm dan a inang lo tih sawiin, “Kalphung thar daih rei lo ber an ni,” a ti a, inthlan a zo va, party dang angin kalphung an rawn nei leh ta tho a, unit an din a, kohhran pawh unit-ah an chhiar leh thei tawh lo tih a sawi.
“An party hotu thenkhatin, ‘Nakkum Nomination Committee hun hi kan thleng pha ang em aw?!’ tiin hlauhthawnna an nei tawh,” tiin, tun ang boruaka an kal zel chuan ZPM hian seat 10 an lâk phak a rin loh thu a sawi a, “An seat neih mek pawh an hum ang em? tih ngaihtuah tham a ni,” a ti.
MNF president chuan Congress chu Delhi chakna êng hmang an ni a, khulamah a burpui a tlu a, helamah a phita a rawp ral zel mai tih a sawi a, “An lenna ber thin hmarchhakah an phita a rawp ral zel a ni tih hretute vek kan nih hi,” tiin a sawi bawk a ni.