Crystal Palace chuan an tlarhnung a khel turin Bayern Munich defender Chris Richards chu kum nga chhung atan an lalut fel.
Kum 22 mi United States international manah hian Pound maktaduai 8.5 an pe phawt dawn a, a bak Pound maktaduai 2.5 an la pek belh leh thei ang.
Richards hian season liamta khan Bundesliga club dang Hoffenheim chu loan in a zawm a. Bayern hian tun nipuiah Juventus atangin Matthijs de Ligt an lakluh avangin a tan inkhelhna hmun tlem zawk tura ngaih a ni a, hei vang hian England a pan.
“He club chanchin ropui tak nei tawh zawm hi thil namai lo tak a ni a, ka phur hle.”
“Premier League en a seilian ka ni a, an star player Wilfred Zaha inkhel a hmuhnawm tiin ka thlir fo thin. Tunah an player thate nena han inkhelh ho hi a nuam dawn hle.”
“Player naupang zawk an ngah a, mahse heng player naupang zawkte hian chak duhna thinlung an nei. Palace hi chak tuma bei tang tang thin club an ni.” tiin a club thar a zawm hnuah a thutlukna siam chhan a sawi.
Richards hian kum 2018 khan FC Dallas atangin Bayern Munich hi loan in a zawm a. Kum 2019 January khan German club in a nghetin an lei.
FC Dallas Academy a inzir chhuak niin an tan match khat mah a khel hman lo thung.
Tlarhnung a khawilaiah pawh khel thei defender hian Bayern Munich first team tan vawi nga a khel tawh a. Season liamta khan Hoffenheim rinrawl niin Bundesliga-ah vawi 30 a inkhel a. USA national team-ah vawi 8 a inkhel tawh bawk a. Kumin World Cup a an player pawimawh zinga tel tura ngaih a ni.
Palace hian tun nipuiah player pali an lalut tawh a, Sam Johnstone, Malcolm Ebiowei leh Cheick Doucoure te an nei tawh.