Wales midfielder Aaron Ramsey chuan club thar a nei a, free transfer in French club OGC Nice a zawm.
Kum 31 mi hian Juventus a kum khat contract a la neih chu July khan club nen inbiakna an neih hnuah tihtawp mai an remti a. Free agent niin hun engemaw chen a awm a, Italy a chhuahsan.
An ram club Cardiff City bakah Premier League kaithar club Nottingham Forest nen sawizawm an ni nasa hman a, mahse France lam pan a thlang ta zawk.
Ramsey hian kumtawp World Cup-ah an ram tana a inlan ngei theihna turin inkhelh tam theihna tur a zawng a, English football-ah kir theihna nei mahse France a team tha zing ami Nice zawm theihna hun a bawhpelh duh lo.
Kum 2019 khan Juventus hi free transfer in Ramsey hian a zawm a, kar khatah Pound 400,000 vel a hlawh niin an sawi.
Serie A leh Coppa Italia te a season hmasa pahnihah chawi mahse Ramsey hian Italy-ah beisei a pha lova, hei vang hian Juventus first team-ah hmun nghet a inkhuar thei lo.
Inhliamin a tihbuai fo bawk avangin season hnih leh a chanve chhungin vawi 70 chauh a inkhel hman.
Scottish club Rangers-ah loan a chhuahtir a ni bawk a. An tan hian player tangkai ni hman mahse Europa League final a Eintracht Frankfurt an tumin penalty shootout-ah a khung lova, trophy chawina hun a neihah a team a chawipui thei lo.
Ramsey hi Welsh player French club zawm pahnihna a ni a. Thawhtanni vêk khan ram tana a inkhelhpui Joe Rodon chuan Tottenham Hotspur atangin loan in Stade Rennes a zawm tawh.