- Mahmuaka Chhakchhuak
Social media lamah tute sex video emawni kan sawi hlut a, a chhe thei ang berin kan sawi a, an tihpalh niloin an tihluih pawh lo ni tehreng sela heti taka kan sawi luih luih kher hi chu a tul ber em aw. Hetiang hi a zahthlak a, a tenawm bawkin kan khawtlang nun nen ngei pawh a inhmeh lo. Chutih lai chuan an lamah ka tang tihna erawh a ni hauh chuang lo a; hetiang taka a tawk chin hre lo ang maia kumkhaw chawr lohna tur hial khawpa kan sawi duh ta mai thin hi chu sim tur kan nei niin a hriat a, bansan tur kan neih hi chu a lang reng mai. Sualna nei ve lo ang maiin leh mahni inhmu lo lekin kan sawi a, keini ang bawka zak ve thei an ni ta loah kan ngai ngeni tawngkam bawlhhlawh tak tak nen kan han sawizui chiam thin hi chu kan tihloh tur kan ti ni hian a hriat. Khawvel a ni a, mi chitin kan awm avangin hetiang hi chu ala tam zel pawh a rinawm zawk a, hei aia rapthlak zawk pawh kan la hmu mai thei zawk hial avang hian tun atanga hetiang dawngsawng thei tura kan inbuatsaih pawh a tul zawk awm e.
A bik takin mizote hi hnam tlem kan ni a, nunau ho zawng zawng nena kan zavaia chhiar pawhin Nuai 12 vel emaw chauh kan la nih lai hian hnam inlungrual leh inpumkhat tlat tur kan ni a, zirna kawngah leh a tha lam kawnga thawhhona tha tak neia hmalam pan tur kan ni. Tunhnaia Central service lama mizo thalaite kan hnufum zia pawh kan sawi chamchi laia a ni lo lam kan bawhchak viau hi chuan kan naktuk hun hi a thim riauin a hriat thin. Mizo hnam hi hnam chapo ang reng tak kan niin kan chhehvela hnam dang awmte hi keini aia chungnung zawkin kan ngai duh lo viau thin a, tunhma atang tawhin Zangkawltukho, Mirawng ho tihte leh Khasi bakthak tihtein kan sawi mai thin. Nimahsela keini aiin khawvel hian a hre zawk daih a, vawiin thleng hian keini aiin zirna kawngah leh thil hrang hrangah pawh an chungnung daih zawk tih hi thalaite hian kan hriat a pawimawh hle a ni.
Meitei hote ngei pawh Hindu sakhaw bia an ni a, Kristian ai chuan chungnung lo zawkah kan han ngai ngawt tak naa a tak tak ramah chuan keini aia chungnun zawkna hi an ngah daih zawk. Ei leh barah keini aiin an intodelh zawk a, kawlphetha leh kawngpui lamah pawh keini aiin an intodelh daih zawk. Politics lamah pawh keini aiin an chungnung zawk a; tunah hian a vawithumna atan Central Minister an nei mek a, keini chuan Central Minister hi pakhat chiah a ni lawm ni kan la neih kha. Zangkawltukho tih kan sawi thinte ngei pawhin Central Minister an neihna hi eng chen nge ni tawh, kan tluk loh an nih hi. Khasite ngei pawhin Governor, UPSC Chairman leh CEC hnate an chelh tawhin Lok Sabha Speaker hial an nei tawh bik a ni a. A lehlamah chuan Mizo hnam hi engemaw hnam dangte aia kan ropui bikna vak hi le tih mai tur a ni a, kan inchhuanna ber Kristianna lah hi hnam dangte aia chungnunna kawnga sawina turin a thatna bik a tam lem lo viau mai bawk si a!
Inti changkang taka Korean incheina kan lo entawn a, kan thalaite’n langsar taka BTS birthday an lawm hreh tawh loh karah hian kan ram leh khawtlang dinhmun chu entawn tlak loh khawpin a tawp thung si a. Ram hruaitute ram hruainaah mipui lung a awih tak tak thei lo a, sorkar hnathawk nuar an awm reng bawkin lungawih lohna lantir pawl an indawt zut a. Ram hruai tuma Politics lama kalte ngei pawh a ruihchilh pawl chuan ruihchilh tak an niin mahni pawlte thatna chiah an hmu a. Mahni sahmim hnawhpuarna tura khaw eng kan zah loh zia te pawh tam tak sawi tur a awm bawk ang a, lemchanga kan hun hmannate pawh kawng hrang hranga sawi tur a awm teuh thei bawk ang. Hetiang hi kum tam tak kal tawh atanga kan nitin hun hman dan ala nih reng avang hian langsar taka kan Kristianna hian mipuiah a tha zawngin nghawng a nei chiam lo ni awm tak a ni. Hengte avang hian a sawia sawi mai a tawk tawh lo a, harh a hun tawh hle a ni.
Sorkar tha, Good Governance kan tih ngei pawh hi kan duh thu sawi sawi thinin kan auna pawh rei tawh viau mah sela, kan sorkar hrawn tawhteah kan lung ala awih tak tak thei chuang ngai lo. Ram hruai tura kan mi thlanchhuahte ngei pawhin an tlin hmaa an intiam angin an awm leh tak tak chuang ngai lo a, lalna leh thuneihna hian mihring alo siam danglam thei viau a ni awm e. Mawhphurhna lak ngamna (Accountability) nei tak tak tura ram hruaitu kan la thlang fuh lo em ni tih turin vawiin thleng hian phunnawina tur kan la nei zelte hi bo tawh sela a duhawm hle a ni. Ram mipuiin natna an tawrh ruala na va thei nghal tur ram hruaitu hi kan duh chu a ni a, entirna atan; CoviD hripuiin nasa taka kan ram a chimbuai mek laia Lunglei chauh niloa chhimbial mipui tana hrik enna khawl tha Rt-PCR chungchangah ngei pawh khati taka mipuiin kan ram hruaitu atana kan thlanchhuahte’n beng an chhu ngawng thei a, khati taka an ngawi thei kha vawiin thleng hian kan la hre reng a, kan theihnghilh mai hian a rinawm loh. An bial mipuite hian kan hre reng fo ang.
Sawi tur tam tak a awm. Mipuite ngei pawh hi benharh kan ngai fo nge ni zawk tih pawh hriat loh hian ram hruaitu atana kan thlanchhuahte hi reiloteah kan sawisel leh chiam chiam thin. Ram hruaitu atana sum lai pai nei emaw kan hmelhriat thate an ni emaw an awmna Party avanga kan thlang chhuak zawk zel a nih a, an mimal thatna aia chungte kan dah pawimawh zawk zel a nih chuan he ramah hian mipuite hian thil tha kan duh tak tak lo tihna pawh a ni thei hial ang. Inthlanpui hnuhnung ber, kum 2018 kum tawpah khan sum leh pai nei leh nei lo inkar hlat zia kan hre hlawmin a rinawm a, kum 2023 Inthlanpuiah ngei pawh hian kan hre leh ngeiin a rinawm. Mipuite hi harh a hun. Mahni tlinna bialah pawh ding ngam tawh loa bial sawn ngai khawpa mipui ngaihzawn lohte pawh hi a awm theih.
Ram hruaitute atang ngei hian ‘Kan hnathawh hi en ula, ram hruaitu atana min la duh a nih chuan min thlang nawn leh rawh u’ tih tawngkamte hi kan hriat chak a ni a, mipuite hian Tlumtea thlir taka kan thlir a ni.