European champion ni lai Real Madrid in trophy chawiin season bul an tan a. European football season khuhhawnna UEFA Super Cup-ah Eintracht Frankfurt 2-0 in an hneh.
Finland a Helsinki Olympic Stadium a inkhelah Los Blancos tan striker Karim Benzema bawk chu langsar berah a tang a. Kumin a Ballon d’Or dawng ngei tura mi tam tak ngaih French striker hian an goal hnihna a khung a. Real Madrid tan goal 324 a khung tawh.A ngai te bawkin Blancos
Carlo Ancelotti pawlte hian May thla khan Liverpool hnehin UEFA Champions League an chawi a. Europa League champion German club lakah minute 37-naah goal an khung.
David Alaba chuan Casemiro ball tauh let chu chiang takin goal-ah a khung a. Frankfurt goalkeeper Kevin Trapp a insiamrem hman tawh lo.
Second half-ah Vinicius Jr. ball cross chu Benzema hian laklawh nei miah lovin goal-ah a khung a. Real Madrid chanchin a goal khung hnem ber pahnihna ni turin Raul a pel a, goal 450 khungtu Cristiano Ronaldo chiah a chungah a awm.
Europa League champion in Super Cup an vawikhat khelhnaah chance tha an nei ve nual a, first half a Daichi Kamada chance neih a uiawm rualin an khingpuite an ngam lo tluan.
Team pahnihte hi kum 1960 European Cup final a an intawn hnua an inkhelh leh hmasak ber a ni a. Hemi tum hian Real Madrid hi 7-3 in an chak.
Ancelotti-a’n Champions League final a a khelhtir team bawk a rem leh a, a vawi ngana atan Super Cup an chawi danah inrintawkna lian tak nen Real Madrid an inkhel a, khelmual chhunga an football khelh atangin a hriat.
Japan striker Kamada in goal a khung loh hnuah German team in Brazilian defender Tuta an mamawh thuai a. Vinicius-a goal khung tur a dang a, Real tlarhmaah Benzema nena an inkawp chu Spanish champion ralthuam hlauhawm ber a ni lehnghal.
Real coach Ancelotti chuan, “Goal hmasa zawk a luh hnuah inkhel kan kaihruai a, tul lo taka thil tih kan mamawh lova, tha seng teuh lo mah ila inkhel kan kaihruai thei kha a pawimawh.” tiin an inkhel a thlirlet.Ballon d’Or dawng tur?
Kum 34 mi striker in season liamta khan goal 44 a khung a, league leh UCL an chawina kawnga Real mi pawimawh ber a ni.
Season tharah a hna ngai a chhunzawm a, Cristiano Ronaldo awmlai a a thlawptu a tang thin hian tunkarah Ronaldo awm loh hnuah a inkhelhdan a thlak danglam a, goal a khung tam sawt thu a sawi.
Frankfurt lakah pawh a che vel a fing a, goal a khung leh bawk avangin kumin Ballon d’Or leh chawimawina dang dawng turin a buk a rit zual hle.
Ancelotti pawhin a player hi a fak uar hle. “Benzema hi a pawimawh hle a, kan hmahruaitu a ni. Amah vangin tun dinhmun a ding hi kan ni a, goal pawimawh a khung hnem. Ballon d’Or dawng tur hi sawi buai tur a awm lo, Karim hi a ni. Kan tan chuan khawvela player pawimawh ber a ni.” a ti.