Box office lama ‘Bullet Train’ film hmanga a lera awm mek Brad Pitt chuan a thawhpui leh ngai tawh loh tur actor list a nei fel ta.
He film-a a chanpui Aaron Taylor-Johnson chuan hemi chungchang hi tunhnai mai khan a sawichhuak a, kum 58 mi hian film a chanlet tur angah te chanpui leh inlanpui a tum tawh loh tur list a dah fel thlap tawh, a ti.
“Khawvelah hian enna leh hlimna thlen a duh a, a bula mite nena hun tha leh hlimawm tak hman pawh a duh. Actor thahnem tak te nena an thawhho hnu ah erawh chuan ‘He mihring nen hian kan thawkdun/ho leh tawh ngai lovang’ tiin list te siam a lo tul thin a. Brad Pitt pawh hian list a nei thlap. ‘Good’ list leh ‘Bad’ list a ni ang chu,” tiin Aaron hian a sawi.
Brad Pitt hi kum 24 mi lek niin Hollywood-ah a zuanglut tan a, lemchan khawvela milar leh hmingthang tak takte nena chang hovin, reilote chhungin amah ngei pawhin hming a chher hman a, superstar lar ber zingah a invawrhchho thei.