India hmarchhak state-a neih thin, International Tourism Mart, 2022 chu November 2-4 chhungin Mizoramin a thleng dawn a, hemi chungchang ngaihtuahtu Organising Committee chu Chief Minister Zoramthanga hovin nimin khan an thukhawm.
Thutkhawm kaihruaitu, chief minister chuan Union Ministry of Tourism leh Mizoram Tourism Department tangkawpin an buatsaih tur, ‘International Tourism Mart’ chu khualzinte hipna atana programme pawimawh tak a ni tih a sawi a, a hlawhtlin nan sorkar hmalakna chauh ni lo, mipui tawiawmna a pawimawh tak zet tih a sawi.
Khawvel hmun hrang hrang atanga tourism industry-a zin mite buaipuitu, tour operator leh travel agent-te fuankhawm tur hi Mizoram tourism industry atan a pawimawhzia leh hun bik chhinchhiahtlak a nihzia sawi bawkin, sorkar department zawng zawng mai ni lova a ram pum pui tanho a tulzia a sawi.
Tourism Minister Robert Romawia Royte chuan International Tourism Mart chungchang sawifiahin, Ministry of Tourism-in India hmarchhak state-a tourism hmasawnna tura a bik taka a duan a nih thu leh kum 2013 atanga buatsaih tanin, kum tina hmarchhak state-ten a inchhawka an thlen thin thu a sawi.
Robert-a chuan, “ITM hi tha tak leh hlawhtling taka kan lo buatsaih chuan khawvel ram zau zawkah Mizoram tourism pho chhuahna hun tha leh remchang a ni a, nasa taka hma kan sawn phahna tur a ni,” a ti.
He thutkhawmah hian chief minister remtihnain a tul anga pawisa hman lailawk hman ni se tih pawm tlan a ni a. International Tourism Mart buatsaih nana sum sente hi union ministry-ah reimbursement a tih leh theih dawn a ni.
ITM hi kum 2021-ah Nagaland-ah an lo nghat tawh a, kumin hi a vawi kuana tur niin Mizoram hi hmarchhak state zinga la thleng lo awm chhun a ni a. ITM atana Mizoram sorkar inbuatsaihna kal zelah organising sub committee peng hrang hrang 12 lai a awm a ni.