Mamit district thuneitute, EE, PWD Mamit division, SDO Kawrthah division, PWD NH division I aiawhte leh Ratna Infrastructure company aiawh ten nimin khan Mamit Bawrhsap Lalnunhlua hovin Mamit district-a inkalpawhna kawng dinhmun te an sawiho a. Dampui khaw hnuai mual tawlhin NH-44A a hnawh mek chu he kawng enkawltu tun thla ni 13 ral hmaa eng lirthei pawh kal theihna tura sialtlang turin he kawng enkawltu Ratna company te chu hriattir an ni.
Bawrhsap hova thukhawm chuan Ratna company chu tuna hnathawhna khawl an hman mek aia tam zawk hmang tur leh nikhata darkar 24 hna thawk turin an ti bawk.
PWD, Kawrthah division hnuaia Bairabi - Zamuang kawng thawmthat hnathawh mek chak zawka thawh a nih theih nan leh PCC pavement siam mekte a char hmaa rahchhiat a nih loh na turin NH-44A kawng ping tihtlang a nih veleh hun engemaw chhung khar lailawk ni se, an ti a. EE, PWD Mamit division-in Mamit - Bairabi kawng thawmthat mek zawh fel tep a nih thu leh Mamit division-in a enkawl zingah kawng ping emaw harsatna lian lutuk thleng a awm rih loh thu a sawi.
Mamit Bawrhsap Lalnunhlua'n kawng chungchanga Mamit district-in harsatna a tawh lian ber chu Dampui khaw hnuaia NH 44A ping mek chu a nih thu leh sial tlang hna thawh mek pawh uluk taka vil a nih thu a sawi a. He kawng chungchangah hian harsatna tam tak a awm nia sawiin, mual tawlhin kawng a hnawh thenfai chu kawngpui siam mektu Ratna Infrastructure company kut a ni lo mahse, thenfai tir an nih thu a sawi.
NH 44A siam mek leiminin a hnawh thenna tur sum chu a hranpaa ministry of road transport-a dil ngai a nih thu leh an sum dil ang te an hmuh thin loh avanga duh anga thenfai ran theih a nih loh thu Mamit Bawrhsap chuan a sawi. NH 44A a pin avang hian kum tam tak zawh tawh loh Dampui kawng hlui chu zawh theiha siam turin district administration in theihtawp chhuahin SDRF leh fund awm remchang ang ang atangin thawmthat hna a thawk reng tih a sawi bawk.