Kangthelhtu 1,000 chuang zet chuan France chhimthlang lama ram kang nasa tak thunun tumin an bei mek a, ramngaw hectare 7,000 dawn a kang chhe tawh niin thuneituten an sawi.
Ram kang hi Bordeaux khawpui bul lawkah niin chenna in pawh a kang chhe nual a, mi cheng 10,000 chuang an tlanchhe tawh.
“Hring ei a ni ringawt, ramhuaia ni,” tiin firefighter representative Gregory Allione chuan France-a RTL Radio a hrilh.
Thli chak tak leh khaw lum lutuk chuan kang thelh hna hi a tikhaihlak nasa hle.
President Emmanuel Macron chuan Austria, Germany, Greece, Poland leh Romania ramten an pui dawn tih a sawi a. “European lungrualna chuan hna a thawk mek!” tiin Twitter-ah a tar lang.
Kumin nipuiah hian France leh Europe ram dang tam takah ram nasa takin a kag a, hei hi hmun hrang hranga khaw lum ber hun leh khawkheng nasa lutuk thlen a ni.
Portugal leh Spain-ah chuan khaw lum lutuk kaihhnawihah mi 1,000 vel an thi.
UK-ah pawh khaw lum uchuak tak thleng tur sawi lawk a ni a, ni li lo awm leh tur chhungin hmun thenkhatah 37°C lai a ni thei dawn tih sawi lawk a ni a. Khaw lum hian hriselna, inkalpawhna leh hna thawhna hmun thlenga nghawng thei tur a nih thu thuneituten an sawi.
Sik leh sa inthlak nasa lutukin khawvel pumah khaw lum leh ro siamin hengte hi ram tikang duhtu ber nia ngaih a ni.
Khawvel pum hi industrial era hun lai aiin 1.2°C chuangin a lum tawh zawk niin mi thiamten an sawi a. Sorkar tam takin khua tilum zual thei an tihchhuah thin tihtlem tumin hma an la mek a, awmzia a la nei thui lo thung.