Indian pakhat chuan kum 22 dawn liam hnuah Rs. 20 leka rel chuan man an laksak tam avanga thubuai a thehluhah thiam a chang ta hram.
Dan hre mi, Tungnath Chaturvedi-a hi kum 1999 khan ticket pahnih lei nan Rs. 20-in an laksak tam a ni.
He thil hi India hmar lam, Mathura cantonment railway station-a thleng a ni.
Consumer court chuan kar hmasa khan Chaturvedi-a hi thiam chantirin railways hnenah an pawisa lak chuansak chu pe kir leh turin a ti.
Kum 66 mi, Chaturvedi chuan, “He thubuai kaihhnawihah hian vawi 100 chuang ka inlan a ni,” tiin BBC a hrilh a. “A pawisa lam thua chhut chuan he inbeihnaah hian ka chak lo a ni,” a ti.
India-ah hian consumer court-te hi mipuiin service chi hrang hranga an lungawi lohna an thlenna a ni a. Thubuai lut a tam em avang erawh chuan rang takin thil an ngaihtuah thei lo va, thubuai holam tak anga langte pawh kum tam tak a awh thin.
Uttar Pradesh-a cheng, Chaturvedi-a hi Mathura atanga Moradabad pana zin niin ticket-booking clerk chuan ticket pahnih a leiah a man pangngai aia tam a laksak a ni.
Ticket hi Rs. 35 man ve ve niin Rs. 100 a pe a, clerk hian Rs. 10 chauh kirin Rs. 70 turah Rs. 90-in a lei tihna a ni.
Ticket a lak lai hian clerk hnenah pawh a leitir to tih a hrilh a; mahse, a kir duh lo a ni.
North East Railway (Gorakhpur) leh booking clerk lakah hian Mathura-a consumer court-ah thubuai a thehlut ta a ni.
India rama court rorel kalpui a muan theih em avangin an thubuai chuan kum tam tak a awh ta niin a sawi.
“Railways hian thubuai hi tihtawp a tum fo va, an laka complaint-te chu consumer court ni lovin, railway tribunal-ah zawk thlen turin an ti a ni,” tiin a sawi a. Tribunal hi railway-in India-a rela zin veivaha lungawi lohna neiten an thlenna tura a din a ni.
“Mahse, kum 2021-a Supreme Court thu rel angin kan thubuai hi consumer court-a ngaihtuah theih a ni,” tiin Chaturvedi chuan a sawi a. A chang chuan judge-ten chawlh an lak thin avangin ngaihtuah hun sawn fo a nih thu a sawi bawk.
Rei tak inkhinna a awm hnuah court chuan thuremna tichhuakin railways hian Rs. 15,000 pe turin a ti a. Hei bakah hian pawisa an kir kim loh, Rs. 20 chu kum 1999 atanga chhutin kum 2022 thleng, kum khata 12% zela punga chhutin pe turin a ti bawk a. Heng pawisa hi ni 30 chhunga an pe lo a nih chuan a punna hi 15%-a tihsan a nih tur thu a tar lang bawk.
Chaturvedi-a chuan zangnadawmna a dawn tur chu a thil paltlang ngaihtuah chuan a hotham hle niin a sawi a. A chhungte pawhin vawi tam an thubuai chu bansan mai turin an hrilh a; mahse, a kaltlangpui ta tih a sawi.
“He thil hi pawisa lam thil vanga ti ka ni lo va, thu dik tanna lam vang zawk a ni a, ei rukna dona atana ti ka ni a, a manhla hlein ka hria,” a ti a. “Advocate ka lo nih ve hlauh avangin dan hre mi chhawr ka ngai lo va, court-a inlan tura kalna sum sen a ngai lo bawk a. Heng thilte hi hautak tak a tling a ni,” a ti.
Mi tute pawh, an nihna chu eng pawh ni sela, an tih dik lohvah mipuiten huai taka an chhan let ngam chuan an kiang ngai dawn lo niin a sawi.
A thubuai chuan mi dangte pawh tihuaiin thubuai an neihah bansan duh hial an neih pawhin beih zel duhna an neih phah a duh thu a sawi.