Aizawl: Govt. Zawlnuam College-in nimina an zirlai lut tharte puala hun an buatsaih chu Hachhek bialtu MLA Lalrindika Ralte chuan khuallian nia hmanpuiin, “Kan bul tanna chu lian lo mah se, kan tawp dan hi a pawimawh,” a ti.
Hachhek bialtu MLA chuan, “Mihring harsatna tawk lo an awm lo a, kei ngei pawhin harsatnate hi ka lo paltlang ve tawh thin. Amaherawhchu, harsatna hi harsatna angin ka hmachhawn ngai lo. Ka hmaa thil lo thleng ve reng angin ka lo hmachhawn thung thin,” tiin, bul tanna leh college pawh duhthusam ni lo mah se, bul tanna hi a len a ngaih loh thu a sawi.
“Zawlnuam College zirtirtute hi hmun danga zirtirtute aia thiam lo bik an ni lo, zirna in tha tak in nei bawk. Hlawhtling turin mamawh dang emaw, chhuanlam tur emaw in nei tawh lo, nangmahni in pawimawh ber. Sawisel tur in nei lo, zir rawh u. Chu chu hlawhtlinna a ni mai,” a ti bawk.
Lalrindika Ralte hian thalaite chu an nih tum an inzawh nawn fo a ngai tih a sawi bawk.
Govt. Zawlnuam College hi kum 1986-ah din a ni a, kum 2007-ah provincialised a ni. Subject paruk - Economics, Education, Political Science, Mizo, English leh History zir theih a ni. Tunah hian teaching staff 22 leh non-teaching staff paruk an awm mek a, zirlai 88 an awm mek bawk.