Saizahawla (L) te nupain kum 2003-a Tanhrila an ram, Tribal Art Centre dinna atana an pek hriatrengna lungphun, Social Welfare & Tribal Affairs Deptt (SW&TA)-in an buatsaih chu nimin khan Saizahawla nau, Social Welfare & Tribal Affairs minister hlui, R Tlanghmingthanga’n a hawng.
Lungphun hawn inkhawm hi nimin chawhnu dar 2 khan Tribal Art Centre, Tanhril-ah buatsaih niin, Saizahawla fapa, Vanlalnuntluanga Renthlei-in a kaihruai a. Saizahawla fanu, Malsawmthangi’n hunserh hmangin, Saizahawla nupui, Tlangkhumthangi pawhin thu a sawi a. SW&TA Deptt. atangin Dy. Director C. Zodinpuii’n thu a sawi bakah SW&TA Deptt-a JE Joseph Vanlalruata’n technical report a pe bawk.
Saizahawla tute pahnih - Mimi Vanlalrempuii leh R. Lalrinmawii ten zaiin kalkhawmte an awi a, Saizahawla fanu, Carolyne Lalthanpuii’n lawmthu sawiin hun a khar.
Tribal Art Centre hi COVID-19 hluar vanglai khan COVID Care Centre atan pawh hman a ni a. Mi mal leh pawl leh sorkar deptt-te pawhin a tula an hman theih dan tur mumal tak SW&TA Deptt-in duangin, mi tam takin an hmang tangkai mek a ni.