Tun season a Serie A khel tur Cremonese chuan Nigeria striker Cyriel Dessers chu Belgian club Genk atangin an lalut.
Kum 27 mi hian ngaihventu club a nei nual a, mahse Italy lam pan a thlang. Cremonese in an leina zah erawh puanzar a ni lo.
Dessers hi season liamta khan Dutch club Feyenoord in loan in an hawh a, an tan goal 20 khungin Europa Conference League final an thlen theihna chhan a ni a. UECL-ah hian top scorer niin goal 10 a khung.
Striker thahrui ngah, penalty area chhunga hlauhawm tak leh ‘finishing’ tha Dessers hi Belgium a piang a ni chungin kum 2020 khan Nigeria tan a inkhel a. A nu lam atangin Super Eagles tan a inkhel thei.
Dutch football a mikhual lo tak niin 2019-20 season khan Heracles tan Eredivisie top scorer a lo ni tawh a. Kum 2020 khan Belgium lam a pan a, Genk tan match 43 atangin goal 11 a khung.
“Khawvela league ropui ber zinga telah ka inkhel dawn a, ka phur tawh hle. Chona hautak tak a ni dawn a, a awlsam dawn lo tih ka hria. Mahse Cremonese kawr ha in theihtawp ka chhuah dawn.” Dessers chuan a ti.