Aizawl : Indopui pahnihnaa Mizo Scout a tel Hav. H. Kaphlira chanchin ziahna Dr. Laltluangliana Khiangte buatsaih ‘War Veteran Hav. H. Kaphlira – India Sipai Rinawm’ tih chu nimin khan Home Minister Lalchamliana’n Aijal club-ah a tlangzarh.
Home Minister chuan "Tunhma Mizo khawtlang nuna eizawnna kawnga hmasawnna atan leh an tu leh fate zirna kawnga chawikan kawngah Mizote tan War Veteran te leh Sipai tang hmasate kha an hlu hle" a ti a. Mizo zinga hruaitu hmasa tam tak pawh Sipai leh Sipai chhungkuaa mi an ni tih sawiin, Sipaia tan chu tha hlea a hriat thu a sawi a. "Mizoram sorkar sum harsatnain hna lak te thui tak a nghawng a, kan thalaite pawhin kan state pawn lama eizawnna dap thiam a tul" a ti bawk.
Sainik Welfare & Resettlement department-in a chhinchhiah danin Indopui pahnihnaa Sipaia tang - war veteran 4000 vel zingah mi 17 an la dam a ni.