4th IR. Bn-in nimin khan an din champha vawi 15-na Mamit-a an awm lailawkna-ah an lawm a, Mamit Bawrhsap Lalnunhlua’n a telpui.
Kum 2003-2008 MNF ministry-ah hetihlaia Home Minister Tawnluia hovin Rengdil-ah kum 2006-a din 3rd IR. Bn. Headquarters awm tura ruahman a ni a. Hemi atan hian Rengdila chhungkaw 24 ten a thlawnin an ram an pe tih RTI hmanga zawhna chhannaah tarlan a ni. Sorkar a inthlaka, Congress kaihhruai sorkarin Rengdil chu kum 2007-a din 4th IR bn. hqrs. tura ti leh zawkin August ni 3, 2013, Inrinni-ah hetih laia Home Minister R. Lalzirliana’n a lungphum a phum nghe nghe.
RTI hmanga zawhna chhannaa a lan danin, 4th IR. Bn. Headquarters chu Rengdila dah tura tih ni mahse, sum lam harsatna avangin Luangpawl, Mamit-a Assam Riffles ho chhuansan hmuna in engemawzat sak sa awm-ah tun thlengin an awm zui ta rih a. Rengdila 4th IR. Bn. Headquarters turah pawh in engemawzat chu sak a ni tawh bawk.
Rengdila 4th IR. Bn. Headquarters turah hian in engemawzat saa hmalak tawh ni mahse, engtikahnge a nih dan tur anga kalpui a nih dawn tih erawh hriat a nih loh thu RTI hmanga zawhna chhannaah tarlan a ni a. Rengdila 4th IR. Bn. Headquarters dahnghehna turin sum engzatmah ruahman a la awm loh thu RTI hmanga zawhna chhannaah chuan tarlan a ni.
4th IR. Bn. Headquarters hmun turah hian sorkar hotu lam thusawi pawh a inkalh fova. Kum 2018 April-a Assembly session-ah hetih laia Home minister R Lalzirlina chuan hetih laia eptu MLA Lalruatkima zawhna chhangin 4th IR bn. hqrs. hmun tur chu Rengdil, Mamit dist-ah ruahman fel a nih thu leh August ni 3, 2013-ah a lungphum pawh phum a nih tawh thua a chhan laiin, hemi tuma session-ah tho hian rorellai MLA TT Zothansanga zawhna a chhanna ah R Lalzirliana chuan 4th IR bn. hqrs. chu Luangpawl, Mamit-a awm a nih thu a sawi thung.
Nimina 4th IR Bn. din champha lawmna hmanpuitu Mamit Bawrhsap chuan 4th IR Bn. chu dan leh thupek kenkawh kawngah leh rikrum thilah district innghahna an nih thu sawiin, an awmna hmun apianga rinawm leh thahnemngai taka thawktu ni theuh turin a chah a. An nun uluk lehzual tura chahin, an kianga mite tana harsatna siamtu ni lova, thlamuanna thlentu ni tura rinawm taka duty thin turin a chah bawk.