Aizawl: Chief Minister Zoramthanga chuan, “Mizoram chhunga chengte hian tling lo leh tha loah inhre mah ila pawn lam atanga min rawn thlirtute chuan mawi leh entawntlak takah min hmuh fo thin,” a ti.
He thu hi nimin Mizoram Kohhran Hruaitute Committee (MKHC)-in Synod Conference Centre-a Ruby Jubilee an lawmna a hmanpuinaah a sawi.
Zorama chuan keimahni leh keimahni insawisel fo thin mah ila, pawn lam atanga thlirtute chuan mawi leh entawntlak an tih thu a sawi a, “Mahni tlin lohna chauh hmu lian loa kan thatna te, kan theihna te tangkaia hmang zawk tur kan ni,” a ti.
Chief minister chuan Mizoramin hun khirh tak a tawn laiin remna a awm theih nan mipui mangang thlabarte thlamuanna hna thawkin, Zoram Kohhran Hruaitute Committee a lo din tak dan a sawi a, Mizorama sipai leh sorkar hotute nen inbiaa harsatna hrang hrang kara hma an lakna te a sawi.
Khatihlai khan zirlai pawl te, tlawmngai pawl te, political party ang leh pawl hrang hrangin remna atan hma la hlawm mah se Zoram Kohhran Hruaitute Committee hmalakna chu lamtang nei loa puitling taka innghah ber nia an hriat avangin an innghahna lian tak a nih thu a sawi a, “India sorkar pawhin a ngaih pawimawh,” a ti.
Mi thahnemngai tak takte tang taka hmalak zarah Mizoramin remna leh muanna tluangtling a neih tak hi mi dang tan, ram dang hnam dang tana malsawmna nih leh chhawnna tur zawk a nih thu chief minister chuan a sawi bawk.
MKHC-in an kum 40 tlinna an lawmna hi MKHC Vice Chairman Rev. Zion Varmawia Fanchun chuan kaihruaiin Ruby Jubilee Souvenir tlangzarh a ni a, an Secretary Rev. R. Lalrinsanga hnen atangin report ngaihthlak a ni.
August 13, 1982 khan Zoram Kohhran Hruaitute Committee (ZKHC) tia din niin April 2, 1998 khan Mizoram Kohhran Hruaitute Committee (MKHC) tia thlak a ni.