Spanish football club Barcelona chuan an sum dinhmun siamthatna turin hma an la chhunzawm zel a. Zanin a La Liga season an tan hma a an player tharte an ziah luh theihna turin an Barca Studios an hralh then.
Barcelona hian Orpheus Media hnenah Barca Studios a share hi 24.5% chu Euro maktaduai 100 in an hralh thu an puang.
Tun dinhmunah player ziah luh loh pasarih an nei a, hetia sum hlawm lian an hmuh atang hian ziak lut turin harsatna awm tawh lo tura an ngai.
La Liga chuan inziahluh a nih dawnah engkim a en fel vek phawt dawn a. Barcelona hian player hlawha sum an sen zat an la tihhniam belh erawh la ngai tura rin a ni a, mahse hei hi Gerard Pique-a contract tih tlem a nih chuan harsatna awm lo tura ngaih a ni bawk.Chiang zawkin
Barcelona in an Barca Studios hralh then hi tun nipuiah an club sum dinhmun siam thatna tura hma an lakna kawnga a thawh li na nia sawi a ni a. Tun nipuiah tho Barca Studios neitu nihna 24.5% chu Socios.com hnenah an hralh tawh.
Hemi bakah hian La Liga television rights an neih atanga 25% chu kum 25 chhung atan Euro maktaduai 500 in Sixth Street investment firm hnenah an lo hralh tawh bawk.
Barcelona-ah hian tunhnaiah Sergi Roberto leh Ousmane Dembele te pawhin contract thar an ziak tawh a, hei pawh hi Spanish league lamin an la enfiah lo.
Nikum khan Barca hian hetiang deuh tho hian hma a lo la tawh a, Memphis Depay leh Eric Garcia te chu Pique hlawh an tihhniam hnuah season tan dawn hma ni ah an ziak lut thei chauh.