Brazilian sang rual chuan khawlaiah chhuak khawmin President Jair Bolsonaro-a’n October thlaa inthlan lo awm turah a chak lo a nih pawhin thuneihna chan zui zel a tum ang tih hlauvin duh lohna an lantir.
Duh lohna hi Ningani khan khawpui lian hrang hrangah lantir a ni a, far-right hruaitu hian mipui rorelna kalphung kalh leh mipui duhthlan zah lovin thuneihna chan zui tuma a chet mai an hlau.
Bolsonaro-a hian vawi eng emaw zat Brazil-a vote an thlak dan kalphung chu a lo sawisel tawh thin.
Electronic voting machines chu tihchingpen theih loh niin a sawi a, paper-a inthlan chu dik tawk lovah a ngai.
Kum khat liam taah khan Bolsonaro hian an inthlan dan chu thlaka ballot paper hmanga inthlan turin a rawt a; mahse, he rawtna hi Congress-ah a tlang zo lo.
Amah sawiseltute chuan president hian United States president chhuak ta, Donald Trump-a ang mai khan inthlanah a chak lo a nih chuan thu dik tawk lo vawrh darha thil tihbuai leh thuneihna chan zui tuma hma a lak leh tun atanga chutiang tura a inruahman an hlau a ni.
Ningania mipuite an inhawr khawm ni chiah hian khua leh tuite manifesto pawh tihchhuah a ni ve chiah a, he an manifestor-ah hian Brazilian maktaduai velin an hming an ziah hnan.
Mipuiten manifesto an puan hi kum 1977-a Brazil-a mi pakhat rorelna paih thlak a nih tuma mipuite tanchhan ang deuhva duan kha niin an rama mipui rorelna chuan derthawn lam a pan mek niin an hria a ni.
Rio de Janeiro, Brasilia leh Recife khawpuiahte mipuite hian duh lohna hi an lantir a, hetih lai hian manifesto hi University of São Paulo tuala puan niin mi tam tak an pungkhawm bawk.
Mipuite hian Bolsonaro duh lohna thu ziak an lek chhuak a, ‘mipui vote zah rawh, mipui zah rawh’ tiin an au rual a; mi thenkhat chu electronic voting machine lem nen an thawk chhuak bawk.
Kum 2019 atanga an ram president pisa luah tan, Bolsonaro-a hi mipui ngaihdan lakah a hniam sawt hle a. Hetih rual hian mipuite hnenah hian an ram inthlan kalpui dan chu danpui chauhvin a khawih thei a, mipui rorelna a awm zel dawn tih a sawi.
A elpui party tam tak chuan nasa takin an bei a, heng zingah president hlui, leftist Luiz Inacio Lula da Silva pawh telin, “Kan ram hian mahnia ro inrelna dinhmun a nihna hi humin zah a ngai a. Kan dinhmun pangngaia kir leh kan mamawh,” triin Twitter-ah a tar lang.