India ram chhungah ni khata coronavirus kai hmuh chhuahin mi 15,000 chuang a la nih reng avangin sorkar laipui chuan state-te chu ram zalenna champha, Independence Day lawmnaah punkhawmna lian huaihawt lo tur leh mi tinte hri a darh lohna tura dan zam zawm turin a ti.
Union home ministry chuan hriattirna hi chhuahin, “COVID-19 lakah kan invena kan him zel theih nan inkhawm liantham ang chi pumpelh ni sela, Covid kai lohna tura inkaihhruaina pawh zawm vek tur a ni,” a ti.
Home ministry chuan states leh union territory-te chu ram zalenna champha lawmnaah turah hian district tina hmun pawimawh laiah theuh ‘Swachh Bharat’ campaign huaihawt turin a ti a. Faina lama beihpui thlakna hi chawlhkar hnih emaw, thla khat chhung emaw mahni inpea thawktute nen kalpui turin a ngen bawk.
Home ministry hian sorkar department leh zirna in zawng zawngte chu khuarel humhalhna atan ram zalenna lawmna pual hian thing phun theuh turin a ti bawk.INDIA DINHMUN
India ramah hian darkar 24 liam ta chhung khan Covid-19 kai hi mi 16,561 hmuh leh hman niin mi 4,42,23,557-in an kai ta a, enkawl lai erawh hniam leh hretin mi 1,23,535 an la awm mek tih union health ministry-in a tar lang.
Darkar 24 liam ta chhung hian mi 49-in thihpui leh hmanin mi 5,26,928-in an thihpui ta a. Thihpui chhinchhiah thar zinga mi 10 hi Kerala-a mi, a hma lama thi tawh, chhinchhiahnaa telh thar an ni.
Hri kai hmuh chhuah tawh zawng zawng atanga chhutin enkawl lai hi 0.28% an la ni mek a, enkawl dam tawh hi 98.53% an tling tawh thung tih health ministry chuan a tar lang.
Darkar 24 liam ta chhung hian a kai hmuh chhuah thar aia enkawl dam an tam zawk avangin enkawl lai hi mi 1,541-in an tlahniam leh hman a ni.
Darkar 24 liam ta chhunga sample endik zinga 5.44% chuan hri leng hi an kai tih hmuh chhuah niin chawlhkar khat liam ta chhunga endik zinga 4.88%-in an kai bawk.
Health ministry-in a chhinchhiah dan chuan Covid-19 kai hmuh tawh zinga mi 4,35,73,094 chu enkawl dam an ni tawh a, hri leng thihpui hi 1.19% an ni thung.
Invenna pek beihpui thlak kam mek zelah vaccine dose vaibelchhe 207.47 pek a ni tawh a. State leh UT hrang hrangah vaccine hman loh dose vaibelchhe 7.32 chuang la dah that a ni tih health ministry chuan a sawi.
Kerala-a mi 10 thi chhinchhiah bakah thihpui thar mi 39 zingah Delhi leh Karnataka-in paruk ve ve an thawh, Maharashtra-ah panga, West Bengal-ah pali, Punjab leh Uttar Pradesh-ah pathum ve ve, Gujarat, Sikkim leh Uttarakhand-ah pahnih theuh, Assam, Chandigarh, Jammu & Kashmir, Jharkhand, Manipur leh Odisha-ah pakhat theuh an ni.