Thusawiah fimkhurin, tlema tim deuh a ngaiin a lang
Pawisaah harsatna nasa tak kan tawk a, kan treasury khar mai thei a kan awm lai pawhin thenkhat chu an la hlim thei em em a, hruaitu thenkhat lahin mipui lo bum tur zawngin, harsatna nei lo ang maiin min awmtir an tum a, hmasawnna zia erawh niin a hriat loh thin a ni.
Sorkar in flagship programme tha tak mai SEDP a siam a, chumi tihhlawhtlin tum chuan theihtawp a chhuah a, hma erawh duh aiin an la tlai deuhin a hriat thung. Pawisa a harsatna kan tawh mek lai leh, kan ram hruaitu thenkhatten sorkar laipui lam dawra an phet dawr dawr laiin, thenkhat erawh chu muangmara awmin, pawisa kan ngah thu sawi tawk an la awm reng bawk a. Hmasawnna hi engtia teh tur nge hriatthiam a har thin ta hle.
Nimin mai khan minister of state Robert Romawia Royte chuan SEDP sem tur sum chu Mizoram sorkarin a sum faiin a kawl reng tawh nia sawiin, reiloteah sem a nih tur thu a sawi a. Sialhawk khuaa Lakhuihthei chingtute leh Village council tangrualin Lakhuihthei Kût an buatsaih a hmanpuinaah he thu hi Tourism Minister Robert Romawia chuan a sawi a ni. SEDP dawngtu zawng zawng ten rinawm tak leh dik taka SEDP sum chu sorkarin a pêk chhan ang taka hman tangkai tur a nih thu a sawi bawk.
SEDP te, healthcare scheme bakah thil dang dang pawh a ni ang, sorkar hian pawisa a nei rih lo tih hi a inpawm thiam rih viau a tulin a hriat a, thu awihawm loh sawi erawh bansan a theih ngang loh pawhin, tim deuh a fuh rihin a rinawm a ni.