Union DoNER Minister Dr Jitendra Singh chuan India hmarchhak state zawng zawngte chu inkalpawhna hmanrua chi khat emaw, a aia tamin emaw a tlawhpawh theih vek tih a sawi.
Thlawhna, rel, kawngpui leh lui atangin hmarchhak state-te hi a tlawhpawh vek theih tih Rajya Sabha rorel inkhawm neih meka ziaka zawhna a chhannaah nimin Dr Singh chuan a sawi a. Hmarchhakah hian inkalpawhna a awlsam zawk nan kawng leh rel kawng siam hna thawh a ni a, thlawhna tumhmunte pawh tihchangtlun a nih thu a sawi.
Minister hian kum hnih lo awm leh tur chhung hian hmasawnna hna thawh hrang hrang zawh felte a sawi a. Heng zingah hian Pakyong Airport (Sikkim), Rupsi Airport (Assam); Lumding- Hojai Rail line doubling project (45 Km), Assam; 300 MW Kameng leh 110 MW Pare Hydro Power project, Arunachal Pradesh; ICP, Moreh leh km 1,819-a thui rel kawngte a tel.
“North Eastern States Roads Investment Programme (Externally Aided Project) hnuaiah kawngpui pathum chu thuam that leh sial a ni a, hemi rual hian Assam-ah lei thar panga dawh niin Meghalaya-ah kawng thar pakhat sial a ni bawk,” a ti.
Tripura-a hna thawh zawh zingah Agartala – Sabroom rel kawng thar, km 112-a thui leh NH-8 kawng bakah Gomati-ah tuikawng siam zawk a ni bawk.