Aizawl : Dy. Chief Minister Tawnluia’n infiamna chawikanna turin sorkarin sports policy mumal tak a duang nia sawiin, international level thlenga thalaite chherchhuah tum a nih thu a sawi.
Khawzawl district Badminton association buatsaih Mazuala Memorial 36th MBA official championship senior-2022 kharna hun nimina Khawzawl Vengthar YMA hall-a a hmanpuinaah he thu hi Deputy Chief Minister a sawi a. Sports council hnuaiah association hrang hrangte felfai taka an inenkawl mek thu sawiin, "Chumi rah chu kan seng tan mek a ni", a ti.
Dy CM chuan "Commonwealth Games-ah Weightlifting Gold Medalist Jeremy Lalrinnunga leh Hockey Bronze medalist Lalremsiami te hmangin Mizo ten hming kan chher" tiin, football phei chu mi tam takin eizawnna atan an hmang mek niin a sawi a. "Hma kan sawn zel theih nan sorkar pawhin theihtawp a chhuah mek a ni", a ti bawk.
Infiammite chu ruihhlo leh a kaihhnawih laka fihlim tum tur leh midangte zirtirtu nih tum turin Tawnluia chuan a fuih a. Hlawhchham vawikhat avanga beidawng mai lova hla- whtlinna hmuh hma chu beidawng lova kal zel turin a chah.
Nimin vek khan Dy CM chuan Khawzawl Zaingen branch MUP Run a hawng a. Sorkar thuchhuahin a tarlan danin, MUP Run hmun hi Rs 30,000 in Zaingen branch YMA-in an leisak a, building sak bultan nan BDO-in hma a lakpui a, bialtu hmasa Lalrinliana Sailo-in MLA fund Rs 50,000 a pek bakah, tuna bialtu Tawnluia'n Rs 3,00,000 a pe a. Tanpuina leh sum hmunhna dangte bakah hnatlang tha te hmanga sak puitlin a ni.