Pachhunga University College Principal Prof. H.Lalthanzara chuan tun hnaia an college-in hlawhtlinna hrang hrang a chante chu PUC hlawhtlinna chauh a ni lo a, Mizo mipuite hlawhtlinna a nih thu a sawi.
Nimin khan Prof. H.Lalthanzara leh PUC hotuten chanchinbumite an kawm a, tun hnaia an college-in hlawhtlinna hrang hrang an chan thu a sawi a, vawilehkhata hetiang dinhmuna ding thut hi a ni bik lo va, kum eng emaw zat kalta atang khan kawng hrang hrangah theihtawp chhuaha tan an lak vang a nih thu a sawi.
PUC principal chuan India rama zirna inte endiktu, National Assessment and Accreditation Council (NAAC)-in July 20-21, 2022 chhung khan an college an endik hnuah Accreditation A+ Grade pek an nih thu sawiin, “Kum 2016 khan A+ Grade pek kan lo ni tawh a, tun tumah hian endik hmasak aiin hma kan sawn zawk,” a ti.
Sorkar laipui, Ministry of Education hnuaia India rama zirna sang dinhmun endiktu, National Institutional Ranking Framework (NIRF)-in ranking an tihchhuah thar berah PUC-in college category-ah 45-na dinhmun an hauh phak thu a sawi a, Top 100 zingah hian India hmarchhakah PUC chu a lang awmchhun a nih thu a sawi.
PUC principal chuan India ram chanchinbu lian, India Today chuan kum 2022 chhunga college tha zual, ‘The Best Colleges in India’ a thlan chhuah zingah PUC chu telh a nih thu sawiin, “Arts zirnaah ram pumah 141-na a ni a, Science-ah 167-na niin Commerce zirnaah 183-na a ni,” a ti.
Hengte bakah hian Green Audit-ah ‘Platinum Rank’ pek an nih thute, ‘District Green Champion 2021-2022’ chawimawina chu March 22, 2022 khan hlan an nih thute sawiin, thisen pek, website enkawl that kawngah te pawh dinhmun sang pawlah an ding tih a sawi bawk.