Aizawl: Mizoram Pradesh Congress Committee (MPCC) chuan nimin khan political session an nei a, President Lalsawta chuan Mizoram tluchhe mek tungding leh tura a chhe lai siam tha turin an party-a haw khawm turin sawmna a siam.
Congress Bhavan-a hun hmanah Lalsawta hian Congress an sorkar loh chuan Mizoram a ngaihtuahawm thin a, kum 2023-a an sorkar loh phei chuan ram chhiat dan tur hi a nasa dawn tih sawiin, “Chuvangin, a chhe lai siam thatu ni turin, Congress party-a lo awm tawh zawng zawng, eng emaw vanga kan party atanga chawl tawhte pawh, Congress party-a lo haw khawm leh vek turin thinlung leh tihtak zetin ka sawm che u a ni,” a ti.
MPCC aiawh thupuangtu, Dr Lallianchhunga pawhin thu sawiin, Congress party chu sakhua leh mihring zalenna chawisangtu leh humhim duhtu party a nih thu a sawi a. Central-a BJP a sorkar hnu hian Kristiante rawngbawlna hrang hrangin harsatna a tawk mek tih sawiin, Central Hindu BJP sorkar hnuaiah MNF party hotute hian Kristiante thlavang vawi khat mah an la hauh lo niin a sawi.
Mizorama Congress party chak leh chak loh hi Delhi-a an dinhmunin a hril nia sawi thin chungchangah Dr Lallianchhunga chuan, “Delhi-a Congress party dinhmun nena Mizorama kan dinhmun sawi zawm thintute hi Central Hindu BJP-a innghat party an ni,” a ti a; Mizoram BJP president-in MNF-te hi BJP hnen atanga inthlanna campaign senso, sum leh pai dawng angin a lo puh tawh thu leh, Nagaland BJP hruaitu leh Mizoram viltu, M. Kikon pawhin, ‘MNF-te hi BJP vanga sorkar thei chauh an ni,’ tih a sawi pawh tun thlengin MNF hotuten an chhang ngam lo niin a sawi.
Dr Lallianchhunga chuan Mizoramah tualto party tam tak a ral tawh a, national party lian tak Congress party an awm chhung chuan tualto party lian tak pahnih a awm thei lo tih sawiin, “MNF leh ZPM hi an indip ral thuai dawn. ‘Min enchhin rawh u,’ titute hi mipuiin kan enchhin tawh hnu te, kan duh loha kan paih leh tawh hnute an ni a. An zinga thenkhat chu vawi eng emaw zat inthlanna lo chuh ve tawh, mipuiin enchhin tlaka kan ngaih lohte tho kha an ni,” a ti bawk.
He hunah hian India Independence Day vawi 75-na puala hun hman niin, Resource Person Sangzuala Hmar, Chairman, Social Media Deptt-in ‘BJP Thupui: Zalenna Zin Kawng Tihdanglam’ tih thupui chu Power Point presentation a nei.