Minister of state Robert Romawia Royte-in SEDP sem tur sum chu Mizoram sorkarin a sum faiin a kawl reng tawh nia sawiin, reiloteah sem a nih tur thu a sawi.
Sialhawk khuaa Lakhuihthei chingtute leh Village council tangrualin nimina Lakhuithei Kût an buatsaih a hmanpuinaah he thu hi Tourism Minister Robert Romawia Royte chuan a sawi a. SEDP dawngtu zawng zawng ten rinawm tak leh dik taka SEDP sum chu sorkarin a pêk chhan ang taka hman tangkai tur a nih thu a sawi bawk.
Robert Romawia Royte chuan Sialhawk khaw mipui leh thalai ten hna an thawk nasa chu lawmawm a tih thu sawiin, taima taka hnathawh chu sual dona tha ber a nih thu a sawi a. Hmasawn nan leh ram leh hnam humhalh nan pawh taimak a pawimawh tih sawiin, “Japanese te leh Chinese te changkan em em chhan pawh an taimak vang a ni”, a ti.
Sialhawk VC team te All Mizoram Inter village tournament-a finalist an ni thei a lawmpui thu Robert Romawia chuan sawiin, football field tihchangtlunna an dil pawh project siam tawh a nih thu leh sanction erawh a la awm loh thu a sawi a. Sialhawk HS tan computer set 7 leh a behbawm te a pe a. Sialhawk HSS building sak nan NECS kaltlangin NGO project hnuaiah Rs. nuai 24 pawmpuina tur hmuh tawh a nih thu leh a sum pawh release thuai beisei a nih thu a sawi bawk.
Lakhuihthei Kût hi lakhuihthei chingtute tihphur nan leh an lakhuihthei thar te tihlar leh hralh chhuah kawnga puitu a nih beiseia bialtu MLA, Deputy CM Tawnluia’n a ruahmanpui a nih thu sorkar thuchhuah chuan a tarlang.