Aizawl: Social Welfare Minister Dr. K. Beichhua chuan nimin khan Tipa Primary Health Centre (PHC) building thar a hawng.
PHC hawnna inkhawmah Dr. K Beichhua chuan thu a sawi a. Covid-19 vanga hun khirh tak karah an thil tum an puitlin loh tam tak a awm tih sawiin, chutiang karah Tipa PHC building thar an hawng thei ta chu ropui a tih thu a sawi a. PHC hawn tak chu a changtu health minister-in hawnsak tura a tih anga hawng a nih thu a sawi.
Dr. K Beichhua chuan, “Health kan tih chuan damdawi in tha leh khawl ropui tak takte mitthlaah a lang a, na reng tura siam kan ni lo, damdawi in mamawh lo tura kan lo invenlawk hi a pawimawh ber a ni a, natna tam tak chu keimahni siamchawp natna a ni,” a ti.
Sub Centre-te leh PHC-te chu changtlung taka thuam tur a ni lo a, district damdawi in thlen ngai loa lo invenlawkna hmun, ralvengtu hmasa a nih thu sawiin, “Primary level-ah inven that chuan district damdawi in thlen ngai an tlem hle ang,” a ti bawk.
Tipa PHC hi NEDP (2018-19) atanga Rs nuai 144.8 hmanga sak niin, Zamzo Construction & Consultancy Services-in a sak hna an thawk a. December, 2019-ah sak tan niin kumin January-ah sak zawh a ni a, square metre 426-a zau a ni.
PHC hawnna inkhawm hi Dr. Lalnunziri, Chief Medical Officer, Siaha district-in kaihruaiin Tipa SDO (Civil) Lalhmingliana’n technical report a pe a ni.