Uttar Pradesh-a Hindu pawl lian, Sanatan Rakshak Sena te chuan Aamir Khan channa, ‘Laal Singh Chaddha’ chu state huam chhunga chhuah khap bur turin an ngen.
Tun dinhmuna ramchhunga film sawihlawh leh chai hlawh ber tihngam hi nimin piah khan tlangzarh niin, boycott tura ngenna nasa tak karah a ni khatnaah hian cheng vaibelchhe 10 vel emaw lek lalutin, beisei a pha lo hle.
Sena pawla thalai hruaitu Chandra Prakash Singh chuan Aamir Khan hian Hindu pathian te chu nuihzatburah a siam a, Sanatan Dharma dodaltu a ni tia sawiin, “Sanatanis te hian kan ram chhungah a channa film zalen taka tihchhuah hi kan dodal hle a ni. A tul chuan In tin pawh lut chhuakin, Aamir Khan film boycott turin kan ngen ang. State Chief Minister Yogi Adityanath hnenah pawh film chhuah khap turin kan ngen ang,” a ti.
‘Laal Singh Chaddha’ ah hian Aamir Khan leh Kareena Kapoor Khan te inlanin, 1994 kuma Hollywood film lar tak, ‘Forrest Gump’ film lakchhawn a ni a, Tom Hanks channa a ni.