Egypt-a biak ina kangmei chhuakah mi tam tak an thi a, tlan chhuah tuma beitute an inchil hlum nual bawk.
Thuneitute chuan Pathiannia chhiatna thlenga thi hi mi 41 vel niin an sawi a, tam takin hliam an tuar a, thi zingah hian naupang pawh an tel.
Coptic Abu Sifin biak inah hian mi 5,000 vel Mass chhima an inkhawm laiin electric kang atangin an buai ta tih venhim hna thawktute chuan Reuters an hrilh.
Kangmei chhuak hian a chhuahna pui ber a dan avangin a chhunga awmte an inchil phah ta niin an sawi bawk.
Kangthelhtuten kangmei hi an thelh mit tawh a. Kangmei chhuah chhan tak hi an la hre lo.
A bul lawk, Imbaba-a biak ina mi, Father Farid Fahmy chuan electric short circuit vanga chhuak niin AFP news agency a hrilh thung.
“Power a awm lo va, generator an hmang a ni,” a ti a. “Power a lo awm leh a, overload a siam ta a ni,” a ti.
Inkhawma telte chuan an thil tawn hi a rapthlak hle tih an sawi.
“Chhawng thumna leh linaa mipuite chuan chhawng hnihna atanga meikhu chhuak an hmu a. Kal thlaknaah an tlan thla a, an inbaw thlu pheng phung a ni,” tiin Yasir Munir chuan Reuters a hrilh.
“Thil a puak a, a tek chuai chuai a, tukverh atangin mei a lo lut zui a ni,” a ti a, ani hi a fanu nen chhawng hnuai bera awm niin an tlan chhuak thei a ni.
Egyptian President Abdel Fattah al-Sisi chuan chhiatna tawk chhungkuate a tawrhpui thu a sawi.
Prosecutor pisa chuan kangmei chhuah chhan chhuitu tur team an tir nghal tih an sawi.
Giza hi Nile leh Cairo inkar niin Greater Cairo metropolis huama mi a ni.
Egypt-ah hian mi maktaduai 103 cheng zinga maktaduai 10 vel hi Coptic Christian an ni.
Copt-te hian hmuhsit leh tihduhdah pawh an tawng nasa niin an insawi thin a, Egyptian vantlang nunah pawh an zat a tam ve ang huin huhang an nei pha lo hle niin an inchhal thin.